Ambasada e Republikës së Kosovës në Londër ka mirëpritur një delegacion nga Kosova, të përbërë nga anëtarë të Bordit të STIKK – Shoqatës së Teknologjisë së Informacionit dhe Komunikimit të Kosovës, i cili po qëndron në Mbretërinë e Bashkuar në kuadër të konferencës së organizuar nga Ambasada e Kosovës në bashkëpunim me BKCC.
Gjatë takimit, Ambasadori i Republikës së Kosovës në Mbretërinë e Bashkuar, Shkëlqesia e Tij Ilir Kapiti, vlerësoi rëndësinë e zhvillimit të mëtejshëm të sektorit të teknologjisë dhe inovacionit në Kosovë, si dhe forcimit të bashkëpunimit ekonomik dhe profesional me Mbretërinë e Bashkuar.
Ambasadori Kapiti shprehu mbështetjen e Ambasadës për iniciativat e STIKK-ut dhe përpjekjet për promovimin e potencialit të sektorit të teknologjisë së Kosovës në tregun britanik. Ai theksoi gjithashtu rëndësinë e krijimit të mundësive të reja për kompanitë kosovare, si dhe për profesionistët e rinj, përmes lidhjes së tyre me partnerë, investitorë dhe rrjete të reja bashkëpunimi në Mbretërinë e Bashkuar.
Takimi u fokusua në mundësitë për zgjerimin e bashkëpunimit ndërmjet ekosistemeve teknologjike të Kosovës dhe Mbretërisë së Bashkuar, duke synuar krijimin e urave të reja për shkëmbimin e përvojave, zhvillimin e partneriteteve dhe promovimin e inovacionit.
Ambasada e Republikës së Kosovës në Londër mbetet e përkushtuar në mbështetjen dhe promovimin e sektorit privat, teknologjisë dhe inovacionit, si dhe në prezantimin e potencialit të kompanive dhe profesionistëve nga Kosova në tregun britanik./kudoshqip.com
