Marrëveshja e tregtisë së lirë ndërmjet EFTA-s dhe Kosovës ka hyrë plotësisht në fuqi, duke krijuar mundësi të reja për eksport, import dhe bashkëpunim ekonomik ndërmjet Kosovës dhe Norvegjisë.
Me rastin e hyrjes në fuqi të marrëveshjes, më 1 tetor në Oslo u mbajt një seminar ekonomik i organizuar nga SMB Norge dhe Dhoma e sapothemeluar Norvegjezo-Kosovare e Tregtisë.
Në aktivitet morën pjesë ambasadorja e Kosovës në Norvegji, dr. Nita Luci, drejtori ekzekutiv i SMB Norge, Jørund Rytman, kryetari i Dhomës Norvegjezo-Kosovare të Tregtisë, Jørn Wad, si dhe përfaqësues të komunitetit të biznesit.
Seminari u fokusua në mundësitë që marrëveshja e re krijon për kompanitë e të dyja vendeve, veçanërisht në fushën e tregtisë, shërbimeve dhe investimeve.
Më pak barriera për bizneset
Sipas qeverisë norvegjeze, marrëveshja synon të rrisë tregtinë dhe të krijojë kushte më të parashikueshme për bizneset.
Eksportuesit norvegjezë do të përfitojnë nga tarifa doganore zero për produktet industriale, përfshirë produktet e detit, ndërsa Kosova do të ketë qasje më të favorshme në tregun norvegjez për produkte të ndryshme, përfshirë mobilie, tekstile dhe një sërë produktesh bujqësore.
Marrëveshja përfshin gjithashtu shërbime si telekomunikacioni, inxhinieria, shërbimet e biznesit, distribucioni dhe sektori i energjisë. Ajo parashikon edhe mbrojtje më të mirë të pronësisë intelektuale.
Për bizneset kosovare, kjo paraqet një mundësi për të zgjeruar eksportet drejt tregut norvegjez, ndërsa kompanitë norvegjeze mund të gjejnë në Kosovë partnerë, furnizues dhe mundësi të reja bashkëpunimi.
Roli i Dhomës Norvegjezo-Kosovare të Tregtisë
Një nga zhvillimet e reja është themelimi i Dhomës Norvegjezo-Kosovare të Tregtisë, e cila synon të shërbejë si urë lidhëse mes bizneseve të dy vendeve.
Dhoma do të ofrojë një platformë për krijimin e kontakteve, shkëmbimin e përvojave dhe identifikimin e partneriteteve të reja.
Megjithatë, kompanitë që duan të përfitojnë nga marrëveshja duhet të kenë parasysh edhe rregullat e origjinës së produkteve, dokumentacionin doganor dhe kostot e transportit e të distribucionit.
Tregtia Kosovë–Norvegji
Tregtia ndërmjet dy vendeve ishte rreth 113 milionë korona norvegjeze në vitin 2025, ndërsa marrëveshja e re synon të krijojë bazën për rritjen e mëtejshme të këtij bashkëpunimi.
Negociatat për marrëveshjen nisën në vitin 2022 dhe përfunduan në shtator 2024. Ajo u nënshkrua në Davos më 22 janar 2025 dhe hyri në fuqi për Norvegjinë, Islandën dhe Kosovën më 1 shtator 2026. Nga 1 tetori 2026, marrëveshja zbatohet edhe për Zvicrën dhe Lihtenshtajnin.
Për bizneset e Kosovës dhe Norvegjisë, marrëveshja hap një kapitull të ri bashkëpunimi dhe krijon mundësi për më shumë tregti, partneritete dhe investime./kudoshqip.com
