Sulmuesi kosovar, Vedat Muriqi, po kalon një tjetër sezon fantastik në aspektin personal në La Liga me fanellën e RCD Mallorca, duke u afruar gjithnjë e më shumë drejt një rekordi historik që do ta vendoste emrin e tij në librat e klubit spanjoll.
Muriqi është vetëm një gol larg barazimit të rekordit të Samuel Eto’o si golashënuesi më i mirë në histori të Mallorcas në La Liga, ndërsa ka në dispozicion edhe tetë ndeshje për ta kaluar këtë shifër.
Një arritje e tillë do të përbënte një moment historik për sulmuesin kosovar, i cili ka qenë një nga figurat më të rëndësishme të skuadrës që prej transferimit të tij në Spanjë.
Në horizont ndërkohë po rikthehet fuqishëm edhe një pistë e njohur: ajo e rikthimit te Fenerbahçe. Fenerbahçe po monitoron nga afër situatën e ish-sulmuesit të saj, ndërsa raportohet se ekziston një interes real për ta rikthyer atë në Stamboll gjatë merkatos së verës.
Vetë Muriqi, sipas burimeve pranë lojtarit, mbetet i hapur ndaj një rikthimi në Turqi, aty ku ai ka lënë një gjurmë të fortë dhe ku kujtohet me shumë respekt nga tifozët e Fenerbahçes.
Megjithatë, gjithçka mbetet e lidhur ngushtë me përfundimin e sezonit në Spanjë dhe objektivin personal të sulmuesit: thyerjen e rekordit historik të Samuel Eto’o, një arritje që do ta mbyllte në mënyrën më të mirë aventurën e tij te RCD Mallorca.
Nëse Muriqi arrin të realizojë këtë objektiv, atëherë rikthimi i tij në Turqi pritet të marrë edhe më shumë hov, duke e kthyer merkaton e verës në një nga lëvizjet më të bujshme në futbollin turk.
