Puna për realizimin e fondit special prej 500 miliardë eurosh nuk ka ecur sipas planit gjatë vitit 2025, megjithëse qeveria e kancelarit Merz vlerëson se ka shenja inkurajuese.
Sipas një raporti të Ministrisë së Financave, i cili pritet të shqyrtohet në komisionet përkatëse të Bundestagut, përdorimi i fondeve për infrastrukturë dhe mbrojtjen e klimës ka mbetur nën objektivat e parashikuara. Fillimisht ishte planifikuar që gjatë vitit 2025 të disbursoheshin rreth 37.2 miliardë euro, por në praktikë janë përdorur vetëm rreth 24 miliardë euro.
Megjithatë, raporti e përshkruan fillimin e programit si përgjithësisht të suksesshëm. Sipas tij, ndikimet e para pozitive janë tashmë të dukshme, veçanërisht në sektorin e ndërtimit të banesave dhe në proceset e dixhitalizimit. Në të kundërt, ritme më të ngadalta janë vërejtur në investimet për energjinë, kërkim-zhvillimin dhe infrastrukturën e transportit.
Nga këndvështrimi i qeverisë federale, fondi special ka ndikuar në stabilizimin e ekonomisë. Vlerësimet paraprake tregojnë se prodhimi i brendshëm bruto real është rritur me rreth 0.5 pikë përqindjeje në afat të shkurtër falë këtyre shpenzimeve.
Fondi në fjalë u miratua vitin e kaluar nga Bundestagu dhe Bundesrati, duke hapur rrugën për huamarrje shtesë deri në 500 miliardë euro për investime strategjike. Ai është planifikuar të zbatohet për një periudhë 12-vjeçare: 300 miliardë euro do të menaxhohen nga qeveria federale, ndërsa 100 miliardë euro do t’u shpërndahen landeve dhe bashkive.
Një shumë tjetër prej 100 miliardë eurosh është rezervuar në Fondin për Klimën dhe Transformimin, me fokus të veçantë në mbrojtjen e klimës./kudoshqip.com/
