Një incident tragjik ka tronditur opinionin publik në Londër, ku 22-vjeçari nga Kosova, Lorik A., humbi jetën pas një sulmi me thikë të ndodhur dy ditë më parë.
Pas ngjarjes, policia britanike arrestoi dy 25-vjeçare dhe një 28-vjeçar, të dyshuar për përfshirje në vrasje. Njëra prej të arrestuarave është liruar me kusht, ndërsa hetimet për zbardhjen e plotë të rastit janë ende në zhvillim.
Familjarët e Lorikut reaguan me dhimbje të thellë përmes një postimi në rrjetet sociale, duke e përshkruar atë si një të ri të dashur, me zemër të madhe dhe me shumë ëndrra për të ardhmen. Ata theksuan se humbja e tij ka lënë një boshllëk të pazëvendësueshëm dhe kërkuan respektimin e privatësisë në këto momente të vështira.
Mesazhe ngushëllimi dhe reagime prekëse u publikuan edhe nga të afërm e miq, ndërsa dhimbjen e saj e shprehu publikisht edhe këngëtarja kosovare Ganimete Abazi, e njohur si “Ganja”, e cila ishte e afërme e të ndjerit.
Rasti ka ngjallur reagime të shumta në komunitetin shqiptar dhe më gjerë, ndërsa autoritetet po vijojnë punën për të sqaruar rrethanat e plota të ngjarjes.
