Më 22 korrik 2010, Gjykata Ndërkombëtare e Drejtësisë hodhi poshtë pretendimet e Serbisë dhe konfirmoi se deklarata e pavarësisë së Kosovës ishte në përputhje me të drejtën ndërkombëtare.
Sot shënohen 16 vjet nga një prej momenteve më të rëndësishme në historinë e shtetformimit të Kosovës. Më 22 korrik 2010, Gjykata Ndërkombëtare e Drejtësisë (GJND) në Hagë publikoi opinionin e saj këshillëdhënës, duke konstatuar se shpallja e pavarësisë së Kosovës nuk kishte shkelur të drejtën ndërkombëtare, përcjell albinfo.ch.
Me 10 vota pro dhe katër kundër, gjyqtarët e GJND-së hodhën poshtë pretendimet e Serbisë, e cila kishte kërkuar nga Asambleja e Përgjithshme e Kombeve të Bashkuara që çështja të dërgohej për shqyrtim në gjykatë.
Vendimi u shpall nga presidenti i atëhershëm i GJND-së, Hisashi Owada, i cili deklaroi se miratimi i Deklaratës së Pavarësisë së 17 shkurtit 2008 nuk kishte shkelur të drejtën e përgjithshme ndërkombëtare.
Ky opinion u konsiderua një fitore e madhe juridike dhe diplomatike për Kosovën, pasi konfirmoi se e drejta ndërkombëtare nuk ndalon deklaratat e pavarësisë. Pas këtij vendimi, disa shtete të tjera njohën Republikën e Kosovës, duke forcuar pozitën e saj në arenën ndërkombëtare.
Kosova shpalli pavarësinë më 17 shkurt 2008 dhe deri më sot është njohur nga 118 shtete. Ndërkohë, vendi vazhdon përpjekjet për zgjerimin e njohjeve dhe anëtarësimin në organizata ndërkombëtare.
Edhe pas 16 vitesh, opinioni këshillëdhënës i Gjykatës Ndërkombëtare të Drejtësisë mbetet një nga bazat më të rëndësishme juridike në mbrojtje të legjitimitetit të pavarësisë së Kosovës dhe një pikë referimi në diplomacinë e saj ndërkombëtare.
