Irani sulmon një tanker gjigant nafte pranë Dubait

Irani ka sulmuar një tanker nafte të papërpunuar pranë Dubait të hënën, ndërsa presidenti Donald Trump ka paralajmëruar se SHBA-ja do të shkatërrojë termocentralet dhe puset e naftës së Iranit nëse nuk e hap Ngushticën e Hormuzit, ka raportuar të martën (31.03.2026) agjencia Reuters.
Sulmi ndaj anijes “Al-Salmi” me flamur të Kuvajtit është i fundit në një varg sulmesh ndaj anijeve tregtare me raketa ose dronë shpërthyes ajrorë dhe detarë në Gjirin dhe Ngushticën e Hormuzit qëkur SHBA-ja dhe Izraeli sulmuan Iranin më 28 shkurt.
Konflikti njëmujor është përhapur në gjithë Lindjen e Mesme, duke vrarë mijëra njerëz, ndërprerë furnizimin me energji dhe kërcënuar të çojë ekonominë globale në një rënie të papritur.
Çmimet e naftës bruto u rritën përsëri për një kohë të shkurtër pas sulmit ndaj tankerit, e cila mund të transportojë rreth 2 milionë fuçi naftë me vlerë më shumë se 200 milionë dollarë me çmimet aktuale.
“Kuwait Petroleum Corp”, pronari i anijes, ka njoftuar se sulmi është kryer herët të martën, duke shkaktuar zjarr dhe dëmtime të trupit të anijes, por nuk pati të lënduar të raportuar.
Autoritetet në Dubai kanë njoftuar më vonë se kishin arritur ta vinin zjarrin nën kontroll pas një sulmi me dron ndaj tankerit. Ata thanë se nuk janë raportuar të lënduar.
Rritja e çmimeve të naftës dhe karburantit ka filluar të rëndojë mbi financat e familjeve amerikane dhe të kthehet në kokëdhimbje politike për Trumpin dhe Partinë e tij Republikane para zgjedhjeve të mesmandatit në nëntor, pasi janë zotuar të ulin çmimet e energjisë dhe të rrisin prodhimin e naftës dhe gazit në SHBA.
Çmimi mesatar kombëtar me pakicë i benzinës në SHBA kaloi 4 dollarë për galon për herë të parë në më shumë se tre vjet të hënën, treguan të dhënat nga shërbimi i ndjekjes së çmimeve “GasBuddy”, ndërsa shtrëngimi i furnizimeve globale i shtyn çmimet e naftës bruto në SHBA mbi 101 dollarë për fuçi.