Ambasadori Dugolli mori pjesë si folës në një ngjarje të rëndësishme ndërkombëtare të organizuar nga Semafor, në partneritet me Gallup, me rastin e publikimit të Raportit Botëror të Lumturisë 2026. Ky aktivitet mblodhi personalitete të shquara nga fusha të ndryshme, përfshirë diplomatë, ekspertë të zhvillimit dhe përfaqësues të organizatave ndërkombëtare, për të diskutuar mbi trendet globale të mirëqenies dhe faktorët që ndikojnë në rritjen e lumturisë së shoqërive.
Në fjalën e tij, Ambasadori Dugolli theksoi përparimin e vazhdueshëm të Republikës së Kosovës në ndërtimin e institucioneve demokratike, forcimin e sundimit të ligjit dhe avancimin e mirëqenies së qytetarëve. Ai vuri në pah se, përkundër sfidave të shumta, Kosova ka dëshmuar një qëndrueshmëri të lartë dhe një orientim të qartë drejt zhvillimit të qëndrueshëm dhe integrimit ndërkombëtar.
Deklaratat e Ambasadorit vijnë në një moment domethënës, kur Republika e Kosovës është renditur në vendin e 16-të në botë në Raportin më të fundit Botëror të Lumturisë 2026. Ky pozicionim i lartë përfaqëson një arritje të konsiderueshme dhe një dëshmi konkrete të nivelit në rritje të kënaqësisë së jetës, besimit në institucione dhe optimizmit shoqëror në vend.
Ambasadori Dugolli nënvizoi se ky sukses nuk është i rastësishëm, por është rezultat i drejtpërdrejtë i angazhimit të vazhdueshëm të qytetarëve, i progresit demokratik dhe i politikave që synojnë përmirësimin e cilësisë së jetës. Ai theksoi gjithashtu rëndësinë e bashkëpunimit ndërkombëtar dhe të partneriteteve strategjike në përkrahje të zhvillimit ekonomik dhe social të Kosovës.
Në përmbyllje, ai ritheksoi se vizioni i përbashkët për një të ardhme më të ndritur, i bazuar në vlera demokratike, përfshirje sociale dhe mundësi të barabarta, mbetet themeli kryesor mbi të cilin ndërtohet progresi i mëtejshëm i Republikës së Kosovës./kudoshqip.com/
