Drena Kusari është emëruar Zëvendëspresidente për Çështje të Korporatave në Microsoft, duke shënuar një arritje të jashtëzakonshme në një nga kompanitë më të mëdha dhe më me ndikim në historinë e teknologjisë globale.
E lindur dhe e rritur në Gjakovë, Kusari u zhvendos në Shtetet e Bashkuara të Amerikës pas luftës në Kosovë, ku ndërtoi një karrierë të suksesshme në disa prej kompanive më prestigjioze ndërkombëtare.
Para se t’i bashkohej Microsoft-it, ajo ka qenë pjesë e organizatave dhe kompanive të njohura globale si McKinsey & Company, Lyft, Goldman Sachs dhe Bumble, ku ka fituar përvojë të gjerë në strategji, menaxhim dhe zhvillim korporativ.
Emërimi i saj në një pozitë të lartë drejtuese në Microsoft përfaqëson jo vetëm një sukses personal, por edhe një shembull frymëzues për profesionistët shqiptarë në mbarë botën. Karriera e saj dëshmon për potencialin dhe kontributin e diasporës shqiptare në skenën ndërkombëtare, veçanërisht në sektorin e teknologjisë dhe biznesit global.
Ky zhvillim vjen si një dëshmi e mëtejshme e rolit gjithnjë në rritje të profesionistëve shqiptarë në kompani lider në nivel botëror./kudoshqip.com/
