Procesi zgjedhor i 7 Qershorit është njollosur nga një vendim thellësisht problematik që po prodhon pasoja të rënda për demokracinë në vend. Qindra e mijëra qytetarë, kryesisht të moshuar dhe persona me nivel të ulët arsimor, po përjashtohen praktikisht nga e drejta e tyre për të votuar.
Vendimi që ndalon asistencën nga familjarët apo edhe nga vetë stafi i komisioneve zgjedhore – përveç rasteve kur paraqitet raport mjekësor – po rezulton diskriminues dhe i papranueshëm në praktikë. Në vend që të garantojë integritetin e votës, ky kufizim po shndërrohet në një mekanizëm përjashtimi masiv.
Nga shumë qendra votimi raportohen raste alarmante: qytetarë të moshuar që nuk dinë të lexojnë, persona që nuk janë të familjarizuar me procedurat e votimit, apo që kanë vështirësi fizike, janë refuzuar për asistencë dhe janë detyruar të largohen pa votuar. Në mungesë të një raporti mjekësor – një dokument që për shumë prej tyre është i paarritshëm në kohë – ata mbeten të përjashtuar nga një e drejtë themelore kushtetuese.
Ky realitet përbën një goditje të drejtpërdrejtë ndaj parimit të barazisë në zgjedhje. Demokracia nuk matet vetëm me organizimin e votimeve, por me përfshirjen reale të çdo qytetari në proces. Kur shtresa të tëra të shoqërisë mbesin jashtë këtij procesi, atëherë legjitimiteti i zgjedhjeve vihet seriozisht në pikëpyetje.
Ekspertët paralajmërojnë se standardet ndërkombëtare kërkojnë që shtetet të lehtësojnë votimin për kategoritë e ndjeshme, jo ta vështirësojnë atë me barriera burokratike. Në këtë rast, vendimi në fjalë duket se ka prodhuar efektin e kundërt – duke përjashtuar pikërisht ata që kanë më shumë nevojë për mbështetje.
Kjo situatë kërkon reagim urgjent institucional. Autoritetet përgjegjëse duhet të rishikojnë menjëherë këtë vendim dhe të sigurojnë mekanizma praktikë që u mundësojnë të gjithë qytetarëve të ushtrojnë të drejtën e tyre për të votuar.
Në të kundërt, zgjedhjet e 7 Qershorit rrezikojnë të mbahen mend jo si një proces demokratik, por si një ditë kur mijëra qytetarëve iu mohua zëri i tyre./kudoshqip.com/
