Gjiganti gjerman i industrisë automobilistike Volkswagen po shqyrton një plan të gjerë ristrukturimi, i cili mund të çojë në shkurtimin e deri në 100 mijë vendeve të punës në mbarë botën. Masa vjen në kuadër të përpjekjeve të kompanisë për të ulur kostot dhe për t’iu përgjigjur sfidave të tregut global.
Sipas raportimeve të medias gjermane Die Welt, propozimet janë pjesë e strategjisë afatgjatë “Vision 2030”, e cila synon rritjen e efikasitetit dhe përmirësimin e performancës financiare të grupit. Plani pritet të diskutohet nga bordi mbikëqyrës në fillim të muajit korrik.
Ndër opsionet që po analizohen është edhe mbyllja e disa fabrikave në Gjermani, përfshirë impiantet në Hanover, Zwickau, Emden dhe uzinën e Audi-t në Neckarsulm. Megjithatë, deri më tani nuk është marrë një vendim përfundimtar dhe nuk ka një afat zyrtar për zbatimin e këtyre masave.
Po ashtu, drejtuesit e kompanisë po shqyrtojnë mundësinë e riorganizimit të markës Volkswagen në një strukturë të veçantë biznesi, me synimin për të rritur fleksibilitetin dhe për të përmirësuar menaxhimin e kostove.
Objektivi i kompanisë është të realizojë kursime prej rreth 11 miliardë eurosh deri në fund të dekadës, pas një rënieje të ndjeshme të fitimeve gjatë vitit 2025. Aktualisht, Grupi Volkswagen punëson rreth 657 mijë punonjës në mbarë botën.
Planet e paralajmëruara kanë ngjallur reagime të forta nga sindikatat dhe përfaqësuesit e punëtorëve, të cilët kanë bërë të ditur se do të kundërshtojnë çdo masë që rrezikon vendet e punës dhe sigurinë ekonomike të mijëra familjeve.
