Presidentja e Kosovës, Vjosa Osmani, u ka bërë thirrje bashkatdhetarëve që jetojnë jashtë vendit të angazhohen aktivisht në zgjedhjet e jashtëzakonshme që do të mbahen më 7 qershor.
Në një video-mesazh drejtuar diasporës, ajo theksoi rëndësinë e pjesëmarrjes së mërgatës në procesin demokratik, duke i ftuar ata që të udhëtojnë drejt Kosovës për të votuar ose të regjistrohen për votim nga jashtë. Sipas saj, diaspora ka qenë gjithmonë një shtyllë e fortë për vendin, sidomos në momentet më vendimtare të historisë.
Osmani kujtoi se gjatë angazhimit të saj institucional, takimet me shqiptarët jashtë vendit kanë qenë ndër më domethënëset, duke reflektuar lidhjen e fortë që ata ruajnë me atdheun. Ajo vlerësoi kontributin e tyre ndër vite, si në periudha sfiduese ashtu edhe në zhvillimin dhe forcimin e shtetit.
Në mesazhin e saj, presidentja theksoi se përfshirja e diasporës në vendimmarrje është thelbësore për të ardhmen e Kosovës. Ajo nënvizoi se sa më e madhe të jetë pjesëmarrja e tyre në procese politike, aq më i fortë bëhet vendi.
Në përfundim, Osmani u bëri thirrje të gjithë bashkatdhetarëve që të mos qëndrojnë indiferentë, por të regjistrohen dhe të ushtrojnë të drejtën e votës, duke ndikuar drejtpërdrejt në të ardhmen e Kosovës.//kudoshqip.com
