Turqia ka nisur procedurat për arrestimin ndërkombëtar të kryeministrit izraelit Benjamin Netanyahu, në kuadër të një çështjeje penale që lidhet me akuzat për gjenocid në Gaza dhe incidentin me aktivistët e flotiljes Global Sumud.
Lajmi është bërë i ditur nga ministri turk i Drejtësisë, Akin Gürlek, i cili deklaroi se Ankaraja i ka kërkuar Interpolit lëshimin e një njoftimi të kuq për Netanyahun dhe shtetasin izraelit Afek Moskovitch. Një masë e tillë synon që personat e kërkuar të identifikohen dhe të arrestohen në vendet anëtare të Interpolit, në përputhje me procedurat dhe legjislacionin e secilit shtet.
Sipas autoriteteve turke, çështja po shqyrtohet nga Gjykata e 11-të e Lartë Penale në Stamboll, me numrin 2026/108, dhe përfshin gjithsej 35 të pandehur, mes tyre Netanyahun dhe Moskovitchin.
Gürlek tha se ndaj dy shtetasve izraelitë janë lëshuar urdhër-arreste që më 14 korrik. Pas kësaj, Ministria turke e Drejtësisë i ka kërkuar Ministrisë së Brendshme të nisë procedurat për kërkesën drejtuar Interpolit për një “kod të kuq”. Dokumentacioni përkatës është përcjellë edhe në Ministrinë e Jashtme të Turqisë.
Procedura lidhet, ndër të tjera, me incidentin ku aktivistë të Global Sumud Flotilla, të cilët synonin të dërgonin ndihma humanitare në Rripin e Gazës, u ndaluan gjatë lundrimit. Autoritetet turke pretendojnë se ndërhyrja ndaj tyre ka ndodhur në ujërat ndërkombëtare.
Hapi i Ankarasë përbën një zhvillim të rëndësishëm në përplasjen diplomatike dhe ligjore mes Turqisë dhe Izraelit lidhur me luftën në Gaza. Megjithatë, një njoftim i kuq i Interpolit nuk përbën në vetvete urdhër-arrest ndërkombëtar dhe zbatimi i tij varet nga autoritetet e shtetit ku personi ndodhet./kudoshqip.com
