Trumpi thotë se memorandumi i mirëkuptimit me Iranin “ka marrë fund”

Presidenti i Shteteve të Bashkuara, Donald Trump, ka deklaruar se memorandumi i mirëkuptimit me Iranin “ka marrë fund”, pas përshkallëzimit të tensioneve dhe sulmeve të kryera nga të dyja palët gjatë orëve të fundit.
Duke folur nga Samiti i NATO-s në Turqi, Trump ka thënë se nuk dëshiron të merret më me zyrtarët iranianë, duke i kritikuar ashpër ata.
“Me aq sa jam në dijeni, është thjesht humbje kohe të merremi me ta. Janë gënjeshtarë… Ka diçka që nuk shkon me ta. Janë të çuditshëm. Me sa kam informata unë, ka marrë fund”, ka deklaruar Trump.
Ai gjithashtu i ka përshkruar iranianët si “të sëmurë e të dhunshëm”.
Deklarata e presidentit amerikan vjen pas shkëmbimit të zjarrit mes Shteteve të Bashkuara dhe Iranit në orët e fundit, përfshirë përplasjet rreth Ngushticës së Hormuzit dhe bazave amerikane në Lindjen e Mesme.
Pavarësisht një armëpushimi të arritur javë më herët, i cili synonte hapjen e rrugës drejt një marrëveshjeje përfundimtare paqeje, tensionet mes dy vendeve janë rikthyer.