Presidenti i SHBA-së, Donald Trump, ka reaguar ashpër ndaj vendimit të Komisionit Evropian për të gjobitur gjigantin teknologjik Alphabet (kompaninë mëmë të Google). Si përgjigje ndaj kësaj mase shumëmiliardëshe, Trump ka kërcënuar se do të vendosë tarifa të reja e të konsiderueshme doganore mbi importet nga Bashkimi Evropian.
“Bashkimi Evropian do të paguajë një çmim shumë të lartë për këtë sjellje të paligjshme dhe jashtëzakonisht joetike, për të cilën i kam paralajmëruar vazhdimisht,” shkroi Trump në platformën e tij Truth Social.
Hetim për “praktika diskriminuese” ndaj kompanive amerikane
Uashingtoni ka njoftuar nisjen e një hetimi zyrtar sipas Nenit 301 të Ligjit të Tregtisë të vitit 1974, duke e cilësuar veprimin e BE-së si “zhvatje” ndaj korporatave amerikane. Ky kuadër ligjor i jep qeverisë së SHBA-së të drejtën të ndërmarrë masa ndëshkuese — përfshirë tarifa doganore — ndaj vendeve që zbatojnë politika tregtare të konsideruara si “të paarsyeshme, të pajustifikuara apo diskriminuese.”
Po në kuadër të këtij neni, Përfaqësuesi i Tregtisë i SHBA-së, Jamieson Greer, vendosi më 22 korrik tarifa të reja ndaj rreth 60 partnerëve tregtarë, me arsyetimin se këto shtete nuk kanë marrë masa të mjaftueshme kundër punës së detyruar.
Shkaku: Gjoba prej 890 milionë eurosh ndaj Google
Reagimi i ashpër nga Shtëpia e Bardhë erdhi menjëhirë pasi Komisioni Evropian i vendosi Google-it një gjobë prej 890 milionë eurosh (rreth 1 miliard dollarë). Sipas rregullatorëve evropianë, kompania ka shkelur rregullat e konkurrencës të BE-së, të cilat synojnë të frenojnë fuqinë dominuese të gjigantëve teknologjikë në treg.
