Gjermania është tronditur nga një incident i rëndë që ndodhi gjatë aktiviteteve të “Christopher Street Day (CSD)” në Berlin, ku një person humbi jetën dhe të paktën 16 të tjerë mbetën të plagosur.
Ngjarja ndodhi mbrëmjen e kaluar pranë zonës së Tiergartenit, në një nga momentet kur mijëra qytetarë po merrnin pjesë në paradën më të madhe në vend për të drejtat e komunitetit LGBTQ+. Sipas informacioneve paraprake, një automjet u fut mes turmës, duke goditur disa persona.
Policia konfirmon se një grua ka ndërruar jetë si pasojë e plagëve, ndërsa nga të lënduarit, tre janë në gjendje kritike, tetë kanë pësuar lëndime të rënda dhe pesë të tjerë janë jashtë rrezikut për jetën.
I dyshuari kryesor është një 21-vjeçar, i identifikuar si Abdul B., i cili sipas autoriteteve njihet nga policia dhe dyshohet për lidhje me qarqe radikale islamiste në Berlin. Rasti po hetohet si një akt i mundshëm terrorist.
Incidenti ndodhi rreth orës 22:00 në afërsi të Potsdamer Platz, ku një furgon i bardhë përplasi këmbësorët përpara se të ndalej pasi u përplas me një pemë. Drejtuesi i mjetit më pas u largua në këmbë dhe aktualisht është në arrati.
Dëshmitarë okularë kanë raportuar se pas përplasjes është parë një person i veshur me të zeza, i cili dyshohet se mbante edhe një mjet të mprehtë. Hetuesit po shqyrtojnë mundësinë që sulmi të ketë pasur më shumë se një fazë, përfshirë edhe sulme me armë të ftohta.
Gjatë natës, policia dhe njësitë speciale zhvilluan operacione të gjera në disa zona të kryeqytetit për kapjen e të dyshuarit.
Kancelari gjerman Friedrich Merz reagoi menjëherë, duke e dënuar ngjarjen si një akt të papranueshëm dhe të rëndë, ndërsa kryetari i Berlinit, Kai Wegner, e cilësoi sulmin si një goditje ndaj vlerave të një shoqërie të lirë dhe demokratike.
Si pasojë e incidentit, organizatorët vendosën të ndërpresin aktivitetet e planifikuara të CSD-së, ku gjatë ditës kishin marrë pjesë qindra mijëra njerëz nën sloganin “Haltung ist hot”.
Motivi i sulmit ende nuk është konfirmuar zyrtarisht, por nuk përjashtohet mundësia që ai të lidhet me urrejtje ndaj komunitetit LGBTQ+. Megjithatë, autoritetet theksojnë se hetimet janë ende në fazë të hershme.
Policia u ka bërë thirrje qytetarëve që të tregojnë kujdes dhe të njoftojnë menjëherë autoritetet nëse hasin personin e dyshuar, duke shmangur çdo përpjekje për t’u afruar./kudoshqip.com
