Një incident i rëndë është regjistruar sot në një shkollë të mesme në Bavari të Gjermanisë, ku disa persona kanë mbetur të plagosur, ndërsa dy prej tyre janë në gjendje më të rënduar.
Sipas autoriteteve policore, një 16-vjeçar është arrestuar si i dyshuar për sulmin. Dy vajza, të cilat janë nxënëse të kësaj shkolle, kanë pësuar lëndime serioze dhe janë transportuar menjëherë në spital. Fatmirësisht, gjendja e tyre nuk raportohet më si kritike.
Ende nuk ka një bilanc të saktë të të plagosurve, por burime paraprake flasin për një numër njëshifror personash të lënduar.
Ngjarja ka ndodhur në gjimnazin “Welfen-Gymnasium” në qytetin Schongau. Dyshohet se autori ka përdorur një thikë dhe mund të ketë pasur edhe një armë zjarri, megjithatë kjo e fundit nuk është gjetur deri më tani.
Autoritetet janë ende në fazën e hetimeve dhe nuk kanë dhënë informacion mbi motivet e mundshme të sulmit apo mbi identitetin e plotë të personave të përfshirë./kudoshqip.com