Shtetet e Bashkuara të Amerikës kanë ashpërsuar qëndrimin ndaj Gjykatës Penale Ndërkombëtare (GJPN), duke sinjalizuar një fazë të re përplasjeje me institucionin me seli në Hagë.
Sekretari amerikan i Shtetit, Marco Rubio, përmes një video-mesazhi të publikuar në platformën X (Twitter), akuzoi GJPN-në se po zhvillon një “luftë juridike” kundër Shteteve të Bashkuara. Ai theksoi se, sipas tij, sfidat ndaj Uashingtonit nuk vijnë më përmes mjeteve ushtarake, por përmes instrumenteve ligjore dhe traktateve ndërkombëtare.
Në të njëjtën linjë, e përditshmja amerikane The Wall Street Journal publikoi një opinion të Rubios me titull provokues mbi qëndrimin amerikan ndaj gjykatës. Ndërkohë, Departamenti i Shtetit ka bërë të ditur se synimi kryesor i SHBA-së është kufizimi i kompetencave të GJPN-së, veçanërisht në rastet që mund të përfshijnë ushtarë apo zyrtarë amerikanë, duke e konsideruar këtë si çështje të sovranitetit kombëtar.
Gjykata Penale Ndërkombëtare, e themeluar në vitin 1998, ka për mandat hetimin dhe ndëshkimin e krimeve më të rënda ndërkombëtare, përfshirë gjenocidin, krimet e luftës dhe krimet kundër njerëzimit. Së fundmi, ajo ka tërhequr vëmendjen globale pas lëshimit të një urdhër-arresti ndaj presidentit rus, Vladimir Putin.
Aktualisht, mbi 120 shtete janë pjesë e kësaj gjykate, përfshirë Gjermania, ndërsa vende si SHBA-ja dhe Izraeli nuk e njohin juridiksionin e saj.
Tensionet janë përshkallëzuar ndjeshëm pas rikthimit në pushtet të Donald Trump. Administrata e tij vendosi sanksione ndaj kryeprokurorit të GJPN-së, Karim Khan, si dhe ndaj disa gjyqtarëve, pas vendimit të gjykatës për të lëshuar urdhër-arreste ndaj kryeministrit izraelit Benjamin Netanyahu dhe ish-ministrit të Mbrojtjes Yoav Gallant.
Tre nga gjyqtarët e sanksionuar kanë paralajmëruar se do të ndërmarrin veprime ligjore kundër SHBA-së, duke i cilësuar masat si të ashpra dhe të pajustifikuara. Sipas tyre, këto sanksione përfshijnë edhe ndalimin e hyrjes në territorin amerikan, duke thelluar më tej krizën mes Uashingtonit dhe drejtësisë ndërkombëtare./kudoshqip.com
