Komanda Qendrore e SHBA-së ka bërë të ditur se do të nisë zbatimin e një bllokade detare në Ngushtica e Hormuzit duke filluar nga ora 10:00 e mëngjesit të së hënës, në përputhje me udhëzimet e presidentit Donald Trump.
Sipas njoftimit zyrtar, masa do të prekë të gjitha anijet që hyjnë ose dalin nga portet iraniane, pa dallim kombësie. Bllokada do të përfshijë të gjitha zonat bregdetare dhe portet e Irani, si në Gjirin Arabik ashtu edhe në Gjirin e Omanit.
Megjithatë, autoritetet amerikane kanë theksuar se anijet që nuk kanë lidhje me portet iraniane do të mund të vazhdojnë lundrimin normalisht nëpër këtë rrugë strategjike detare. Sipas tyre, masa synon të mos cenojë lirinë e lundrimit për trafikun ndërkombëtar që nuk është i lidhur me Iranin.
Ky zhvillim vjen pas deklaratës së mëhershme të Donald Trump për vendosjen e një bllokade, një hap që pritet të rrisë tensionet në rajon dhe të ndikojë drejtpërdrejt në tregjet globale të energjisë, veçanërisht në çmimin e naftës.
Nga ana tjetër, reagimi nga Irani nuk ka munguar. Kryetari i Parlamentit iranian, Mohammad Bagher Ghalibaf, ironizoi situatën përmes një postimi në rrjetet sociale, duke paralajmëruar rritje të ndjeshme të çmimeve të karburanteve në SHBA.
“Shijoni çmimin aktual të benzinës. Me këtë që quhet ‘bllokadë’, shumë shpejt do të paguani edhe 4 deri në 5 dollarë më shumë”, shkroi ai, duke nënvizuar pasojat që mund të ketë ky vendim në tregun ndërkombëtar.
