Rritja e fortë e çmimit të kerozinës, e ndikuar nga tensionet dhe lufta në rajonin e Iranit, po krijon pasoja të ndjeshme në sektorin e aviacionit, veçanërisht në Gjermani. Sipas zhvillimeve të fundit, kostoja e karburantit për avionë është rritur ndjeshëm krahasuar me fillimin e konfliktit, duke ushtruar presion mbi kompanitë ajrore.
Megjithëse autoritetet gjermane, përfshirë kancelarin Friedrich Merz, kanë deklaruar se aktualisht nuk ka mungesë të rezervave të kerozinës, situata mbetet e brishtë dhe mund të përkeqësohet nëse kriza vazhdon. Kjo mund të reflektohet si në rritje çmimesh për biletat, ashtu edhe në reduktim të ofertës së fluturimeve.
Në këtë kontekst, Lufthansa ka vendosur të ndërmarrë masa konkrete, duke planifikuar anulimin e rreth 20 mijë fluturimeve deri në muajin tetor. Sipas kompanisë, ky hap synon të ulë konsumin e karburantit dhe të kursejë rreth 40 mijë tonë kerozinë.
Reduktimet do të prekin kryesisht linjat brenda Evropës dhe do të fokusohen në disa prej nyjeve kryesore ajrore si Frankfurt, Mynih, Zyrih, Vien, Bruksel dhe Romë.
Sipas planeve, valë e parë e shkurtimeve pritet të nisë në fund të majit dhe të zgjasë për disa muaj. Zhvillimet në tregun e energjisë dhe situata gjeopolitike do të mbeten faktorët kyç që do të përcaktojnë hapat e mëtejshëm të industrisë së aviacionit.
