Mijëra shqiptarë nga Shtetet e Bashkuara të Amerikës janë mbledhur në New York për të marrë pjesë në Paradën Shqiptare, një nga ngjarjet më të rëndësishme të diasporës shqiptare në Amerikë.
E organizuar nga organizata “Albanian Roots”, parada ka shndërruar rrugët e qytetit në një festë të madhe kombëtare, ku flamujt kuqezi, veshjet tradicionale dhe tingujt e muzikës shqiptare kanë dominuar atmosferën festive.
Shqiptarë nga Shqipëria, Kosova, Maqedonia e Veriut, Mali i Zi dhe diaspora në SHBA u bashkuan për të kremtuar identitetin, kulturën dhe trashëgiminë e përbashkët kombëtare, duke dhënë një mesazh uniteti dhe krenarie.
Përgjatë paradës, pjesëmarrësit parakaluan me simbolet kombëtare, ndërsa grupe artistike dhe kulturore prezantuan traditat shqiptare para mijëra qytetarëve dhe vizitorëve që ndoqën aktivitetin.
Parada Shqiptare është kthyer ndër vite në një nga manifestimet më të mëdha të komunitetit shqiptaro-amerikan, duke luajtur një rol të rëndësishëm në promovimin e kulturës shqiptare dhe në ruajtjen e lidhjeve të brezave të rinj me rrënjët e tyre.
Organizata “Albanian Roots”, e themeluar në New York në vitin 2009, vazhdon të jetë një nga promotorët kryesorë të aktiviteteve që forcojnë bashkëpunimin dhe unitetin mes shqiptarëve në diasporë.
Përveç komunitetit shqiptar, aktiviteti ka tërhequr edhe përfaqësues të institucioneve amerikane, personalitete të ndryshme dhe qytetarë të kombësive të tjera, duke e bërë paradën një simbol të diversitetit kulturor dhe kontributit të shqiptarëve në shoqërinë amerikane.
Edicioni i sivjetmë konfirmoi edhe një herë se New Yorku mbetet një nga qendrat më të rëndësishme të diasporës shqiptare, ku flamuri kuqezi valëvitet me krenari dhe bashkon shqiptarët pa dallim prejardhjeje.
