Komuniteti shqiptar në Gjermani humb një nga mjekët më të respektuar, pas një sulmi në zemër në orët e mëngjesit.
Një lajm i rëndë ka tronditur komunitetin shqiptar në Gjermani. Gjinekologu i njohur, Dr. Imer Hajdari, ka ndërruar jetë mëngjesin e sotëm në Mynih, si pasojë e një sulmi në zemër.
Sipas njoftimeve të para, ngjarja ka ndodhur të Dielen rreth orës 08:30, duke lënë të pikëlluar familjarët, miqtë dhe pacientët e shumtë që e njihnin dhe e vlerësonin për profesionalizmin dhe përkushtimin e tij.
Dr. Hajdari, me origjinë nga Drenica e Kosovës, konsiderohej një ndër mjekët më të dalluar në fushën e tij në Evropë. Ai ishte i njohur jo vetëm për aftësitë e larta profesionale, por edhe për qasjen humane ndaj pacientëve, veçanërisht ndaj komunitetit shqiptar në Gjermani, të cilëve u qëndronte pranë edhe në gjuhën shqipe.
Miq, kolegë dhe qytetarë të shumtë kanë reaguar me mesazhe ngushëllimi, duke e cilësuar ndarjen e tij nga jeta si një humbje të madhe për mjekësinë dhe për komunitetin.
“Lamtumirë Doki. Pusho i qetë në botën tjetër”, thuhet në një nga reagimet publike.
Vdekja e Dr. Imer Hajdarit lë një boshllëk të madh në fushën e mjekësisë dhe në jetën e shumë njerëzve që ai i ndihmoi ndër vite./kudoshqip.com
