Qytetarët e Kosovës që jetojnë jashtë vendit po ushtrojnë sot të drejtën e tyre të votës në ambasadat dhe konsullatat e Republikës së Kosovës, një ditë para mbajtjes së zgjedhjeve në vend. Procesi i votimit ka nisur në orët e hershme të mëngjesit dhe po zhvillohet në përfaqësitë diplomatike të Kosovës në Evropë dhe më gjerë.
Sipas të dhënave të Komisioni Qendror i Zgjedhjeve, mbi 22 mijë qytetarë janë regjistruar për të votuar fizikisht në ambasada dhe konsullata, ndërsa dhjetëra mijëra të tjerë kanë zgjedhur votimin përmes postës.
Interesimi më i madh për votim vjen nga diaspora në Gjermani dhe Zvicër, ku është regjistruar edhe numri më i lartë i votuesve. Sipas KQZ-së, në Gjermani janë regjistruar mbi 49 mijë votues, ndërsa në Zvicër mbi 23 mijë. Pas tyre renditen Franca, Suedia, Austria, Mbretëria e Bashkuar, Italia dhe Shtetet e Bashkuara të Amerikës.
Votimi fizik po organizohet në 17 ambasada dhe 13 konsullata të Kosovës në vende të ndryshme të botës. Procesi zhvillohet nga ora 07:00 deri në 19:00 sipas kohës lokale të secilit shtet.
Përfaqësuesit e KQZ-së kanë bërë thirrje që të gjithë qytetarët e regjistruar të shfrytëzojnë të drejtën e tyre demokratike, duke theksuar rëndësinë e pjesëmarrjes së diasporës në proceset zgjedhore të Kosovës.
Diaspora vazhdon të mbetet një faktor i rëndësishëm në jetën politike dhe ekonomike të vendit, ndërsa pjesëmarrja e saj në zgjedhje konsiderohet një tregues i lidhjes së fortë që mërgimtarët ruajnë me Kosovën.