Berlin – Presidenti i Ukrainës, Volodymyr Zelensky, ka zhvilluar një vizitë të rëndësishme në Gjermani së bashku me disa ministra të kabinetit të tij, me synimin për të thelluar marrëdhëniet me Berlinin zyrtar. Ky takim shënon konsultimet e para ndërqeveritare mes dy vendeve që prej vitit 2004.
Kancelari gjerman, Friedrich Merz, kishte paralajmëruar që në fund të vitit të kaluar rikthimin e këtyre konsultimeve, me fokus forcimin e bashkëpunimit në fusha kyçe si mbrojtja dhe ekonomia. Në një konferencë të përbashkët për shtyp, ai deklaroi se marrëdhëniet mes Gjermanisë dhe Ukrainës tashmë janë ngritur në nivel strategjik.
Një nga elementët kryesorë të marrëveshjes është bashkëpunimi në fushën e sigurisë, duke përfshirë mbrojtjen e Ukrainës dhe të gjithë kontinentit evropian. Vëmendje e veçantë i është kushtuar zhvillimit dhe prodhimit të dronëve. Në këtë kuadër, ministri gjerman i Mbrojtjes, Boris Pistorius, dhe homologu i tij ukrainas, Mykhailo Fedorov, nënshkruan një marrëveshje bashkëpunimi. Edhe pse detajet nuk janë bërë publike, autoritetet konfirmojnë mbështetje të mëtejshme të konsiderueshme.
Merz theksoi se kjo marrëveshje nuk i shërben vetëm Ukrainës, por edhe vetë sigurisë së Gjermanisë dhe Evropës. Ai vuri në dukje se ushtria ukrainase është ndër më të përvojshmet në Evropë për shkak të përfshirjes së saj në luftëra të vazhdueshme, ndërsa industria e saj e mbrojtjes po shquhet për inovacion. Përvoja e Ukrainës në përdorimin e dronëve është bërë veçanërisht e vlefshme edhe në konfliktet e fundit në Lindjen e Mesme.
Përveç aspektit ushtarak, marrëveshja synon të forcojë edhe bashkëpunimin ekonomik, përfshirë zhvillimin teknologjik dhe digjitalizimin, si dhe të thellojë lidhjet shoqërore mes dy vendeve.
Kancelari gjerman gjithashtu konfirmoi mbështetjen për aspiratat e Ukrainës për anëtarësim në Bashkimin Evropian, duke pranuar se ky proces kërkon kohë dhe nuk mund të realizohet menjëherë.
Nga ana e tij, presidenti Zelensky e cilësoi takimin si të frytshëm dhe theksoi rëndësinë që Gjermania të mbetet një shtyllë e fortë për sigurinë dhe stabilitetin në Evropë.
