Kryeministri i Kosovës, Albin Kurti, është takuar me kancelarin gjerman Friedrich Merz në kuadër të Samitit të XIII-të të Procesit të Berlinit, ku në fokus të bisedës kanë qenë marrëdhëniet ndërmjet Kosovës dhe Gjermanisë, integrimi evropian dhe mundësitë për rritjen e investimeve gjermane në Kosovë.
Përmes një postimi, Kurti bëri të ditur se nga kancelari Merz ka pranuar urime për mandatin e ri qeverisës. Takimi u zhvillua në një moment kur Bundestagu gjerman ka marrë vendim për vazhdimin e qëndrimit të ushtarëve gjermanë në Kosovë, në kuadër të misionit paqeruajtës të KFOR-it.
Kurti rikujtoi gjithashtu rëndësinë e Procesit të Berlinit, të iniciuar nga Gjermania në vitin 2014, si një platformë që synon bashkëpunimin dhe trajtimin e barabartë të gjashtë vendeve të Ballkanit Perëndimor.
Sipas tij, Kosova ka zbatuar marrëveshjet e arritura në kuadër të këtij procesi për lëvizjen me letërnjoftime dhe njohjen e diplomave, duke theksuar se edhe vendet e tjera të rajonit duhet të përmbushin zotimet e tyre.
Investimet gjermane në Kosovë arrijnë rreth 1,5 miliardë euro
Një pjesë e rëndësishme e bisedës lidhej edhe me bashkëpunimin ekonomik. Sipas Kurtit, investimet e drejtpërdrejta gjermane në Kosovë arrijnë në rreth 1,5 miliardë euro, ndërsa 62 për qind e tyre janë realizuar gjatë pesë viteve të fundit.
Ai theksoi se potenciali për bashkëpunim të mëtejshëm mbetet i madh, veçanërisht në industri, energji, transport, teknologji të informacionit dhe komunikimit (TIK), si dhe në arsimin profesional.
Në këtë kontekst, Kurti njoftoi se Prishtina do të mirëpresë javën e ardhshme Forumin e tretë Ekonomik Gjermano-Kosovar, i cili synon të krijojë mundësi të reja për bashkëpunim ndërmjet bizneseve dhe investitorëve të të dyja vendeve.
Në përfundim të mesazhit të tij, kryeministri Kurti e cilësoi Gjermaninë si pjesë të së ardhmes evropiane të Kosovës, duke falënderuar kancelarin Friedrich Merz për takimin./kudoshqip