Sistemi arsimor gjerman po përballet me një alarm serioz. Rezultatet më të fundit të studimit ndërkombëtar PISA tregojnë se performanca e 15-vjeçarëve në Gjermani ka rënë në nivelin më të ulët që nga nisja e këtij vlerësimi, rreth 25 vite më parë.
Në matematikë dhe lexim, rreth një në tre nxënës nuk arrin nivelin bazë të kompetencës. Në shkencë, situata është disi më e mirë, por edhe aty rreth një në katër të rinj nuk e arrin nivelin minimal të përcaktuar.
PISA nuk mat thjesht aftësinë për të memorizuar njohuri. Nxënësit testohen nëse janë në gjendje t’i përdorin ato në situata praktike: të kuptojnë një email të gjatë, të interpretojnë informacionin në grafikë, të krahasojnë çmime apo të nxjerrin përfundime të sakta nga të dhënat që u paraqiten.
Rënia e rezultateve në të trija fushat – matematikë, lexim dhe shkencë – po shihet me shqetësim nga ekspertët, të cilët kanë nisur të analizojnë shkaqet e kësaj situate.
Ndër faktorët e përmendur janë mungesa e mësuesve, pabarazitë sociale, numri i lartë i nxënësve me sfond migrimi, përfshirja jo gjithmonë e mjaftueshme e prindërve në procesin arsimor, si dhe pasojat që la pandemia te fëmijët dhe të rinjtë.
Një tjetër element që po diskutohet është edhe përdorimi i tepërt i pajisjeve digjitale. Telefonat, kompjuterët dhe teknologjitë e tjera mund të jenë mjete të dobishme në arsim, por mbështetja e tepruar tek to, pa një metodologji të përshtatshme mësimore, mund të ndikojë negativisht në përqendrim dhe në zhvillimin e aftësive bazë.
Rezultatet e PISA-s nuk janë vetëm një pasqyrë e nivelit të nxënësve, por edhe një sinjal për gjendjen e sistemit arsimor. Për Gjermaninë, shifrat e fundit ngrenë një pyetje të rëndësishme: a po përgatit sistemi arsimor të rinjtë për sfidat e një shoqërie gjithnjë e më komplekse dhe digjitale?/kudoshqip.com
