Gjermania ka ndërmarrë një tjetër hap për forcimin e sigurisë kombëtare ndaj kërcënimeve nga dronët. Në Cochstedt të Saksonisë-Anhalt u inaugurua qendra e re teknologjike për sigurinë e dronëve, e cila do të fokusohet në zhvillimin, testimin dhe përdorimin e teknologjive për zbulimin dhe neutralizimin e dronëve që mund të paraqesin rrezik.
Qendra do të funksionojë në kuadër të infrastrukturës së Qendrës Gjermane për Aeronautikë dhe Hapësirë (DLR), ku tashmë zhvillohen projekte për përdorimin civil të dronëve, përfshirë monitorimin e bujqësisë, menaxhimin e zjarreve dhe shërbime të tjera publike.
Ministri Federal i Brendshëm, Alexander Dobrindt, e cilësoi situatën si pjesë të një forme të re të kërcënimeve hibride ndaj Gjermanisë. Sipas tij, dronët mund të përdoren jo vetëm për qëllime vëzhgimi, por edhe për sabotim dhe sulme ndaj infrastrukturës kritike.
“Ajo që po përjetojmë sot është lufta në hije e shekullit XXI. Kush synon Gjermaninë, godet të gjithë Europën”, deklaroi Dobrindt.
Në kuadër të zgjerimit të qendrës, qeveria federale planifikon të investojë deri në 10 milionë euro gjatë viteve të ardhshme. Projekti pritet gjithashtu të sjellë rreth 40 vende të reja pune.
Vendimi për forcimin e kapaciteteve kundër dronëve vjen në një periudhë kur autoritetet gjermane kanë ngritur shqetësime për një sërë incidentesh të lidhura me përdorimin e dronëve. Veçanërisht shqetësuese konsiderohen rastet pranë aeroporteve dhe objekteve të infrastrukturës kritike, ku një dron i paidentifikuar mund të shkaktojë pasoja serioze për sigurinë publike.
Qendra e Cochstedt është pjesë e një strategjie më të gjerë gjermane për mbrojtjen kundër dronëve. Kjo strategji përfshin gjithashtu njësi mobile të Policisë Federale dhe një strukturë të përbashkët federale-ländere për koordinimin e masave kundër kërcënimeve të mundshme nga dronët.
Me investimin e ri, Berlini synon të kalojë nga reagimi pas incidenteve drejt një sistemi më të avancuar të zbulimit të hershëm, vlerësimit të rrezikut dhe neutralizimit të dronëve, duke e vendosur teknologjinë kundër dronëve gjithnjë e më lart në agjendën e sigurisë së Gjermanisë./kudoshqip.com
