Qeveria federale gjermane ka dhënë dritën jeshile për një projektligj të ri që synon modernizimin e ndërtesave, duke zëvendësuar ligjin aktual për energjinë – i njohur shpesh si “ligji i ngrohjes”.
Sipas planit, ligji i ri pritet të hyjë në fuqi më 1 nëntor 2026. Megjithatë, ai duhet të kalojë më parë në parlamentin gjerman (Bundestag) dhe në Bundesrat, ku nuk përjashtohet përballja me kundërshtime, pasi tashmë ka ngjallur debate të forta.
Një nga ndryshimet kryesore është heqja e detyrimit që sistemet e reja të ngrohjes të përdorin të paktën 65% energji të rinovueshme. Në vend të kësaj, projektligji parashikon më shumë fleksibilitet: instalimi i sistemeve me gaz apo naftë do të jetë më i lehtë, ndërsa pajisjet ekzistuese do të mund të vazhdojnë të përdoren dhe riparohen pa kufizime të reja.
Në fokus vihet një qasje graduale drejt neutralitetit klimatik. Nga viti 2029 parashikohet që në përdorim të futet një përzierje me rreth 10% lëndë djegëse neutrale për klimën, duke u rritur progresivisht deri në afro 60% në vitin 2040.
Ky ligj nuk prek vetëm banesat, por edhe ndërtesat industriale dhe ato tregtare.
Nga ana tjetër, qeveria synon të vazhdojë mbështetjen financiare për qytetarët dhe bizneset, përmes subvencioneve dhe kredive me interesa të ulëta nga banka shtetërore KfW, për të nxitur investimet në eficiencën energjetike.
Një tjetër element i ri është ndarja e kostove të CO₂ mes qiramarrësve dhe pronarëve, të cilat në të ardhmen pritet të ndahen në mënyrë të barabartë.
Qeveria argumenton se këto ndryshime do t’u japin më shumë liri zgjedhjeje konsumatorëve. Megjithatë, kritikët paralajmërojnë se lehtësimi i përdorimit të teknologjive fosile mund të sjellë kosto më të larta në afat të gjatë dhe të pengojë objektivat klimatike./kudoshqip.com/
