Zgjedhjet e 6 shtatorit në landin gjerman të Saksoni-Anhaltit mund të shënojnë një moment të veçantë në politikën gjermane. Për herë të parë, AfD mund të bëhet partia më e fortë në një land, ndërsa rezultati i zgjedhjeve po ndiqet me shqetësim të veçantë nga shumë njerëz me prejardhje migracioni.
Sipas sondazheve të publikuara para zgjedhjeve, AfD kryeson me më shumë se 40 për qind të mbështetjes, dukshëm përpara CDU-së së kancelarit Friedrich Merz, e cila renditet rreth 24 për qind.
AfD mban një qëndrim të ashpër ndaj emigracionit dhe kërkon kufizimin e tij, shtimin e dëbimeve dhe promovimin e konceptit të “rimigrimit”. Për shumë emigrantë dhe persona me prejardhje migracioni, këto zgjedhje për këtë arsye nuk shihen vetëm si një garë e zakonshme politike.
Shqetësim për sigurinë dhe përkatësinë
Awet Tesfaiesus, deputete e të Gjelbërve në Bundestag dhe e lindur në Eritre, thekson se rezultati i zgjedhjeve mund të ketë një ndikim të drejtpërdrejtë te njerëzit që përballen me racizëm.
Sipas saj, forcimi i qëndrimeve raciste dhe etno-nacionaliste ngre pyetje shumë konkrete për njerëzit me prejardhje migracioni: sa të sigurt ndihen në vendin ku jetojnë dhe nëse konsiderohen pjesë e barabartë e shoqërisë.
Edhe ish-deputeti i SPD-së, Karamba Diaby, i cili ka lindur në Senegal dhe jeton prej dekadash në Saksoni-Anhalt, thotë se dëgjon gjithnjë e më shpesh shqetësime të tilla, veçanërisht nga të rinjtë.
Sipas tij, pyetja që përsëritet është nëse ata mund të vazhdojnë të jetojnë në Gjermani edhe nëse AfD do të arrinte një rezultat shumë të lartë.
“Ofensivë deportimi dhe rimigrimi”
Një prej arsyeve kryesore pse AfD është në qendër të debatit është programi i saj për emigracionin.
Partia kërkon një “ofensivë deportimi dhe rimigrimi”, megjithëse termi “rimigrim” nuk përcaktohet qartë në programin e saj. Në debatin politik gjerman, ky koncept lidhet me propozime për largimin e kategorive të caktuara të emigrantëve dhe shtetasve të huaj, përfshirë dëbimet e personave që nuk kanë të drejtë ligjore për të qëndruar.
Në të njëjtën kohë, programi i AfD-së e përdor termin emigracion në një kuptim më të gjerë dhe përfshin edhe propozime për rikthimin në Gjermani të punëtorëve të kualifikuar gjermanë që jetojnë jashtë vendit.
“Jemi ulur mbi valixhe të paketuara”
Në komunitetet e emigrantëve në Saksoni-Anhalt, reagimet janë të ndryshme.
Batoul Nayouf, me origjinë nga Siria dhe pjesë e Rrjetit Shtetëror të Organizatave të Emigrantëve të Saksoni-Anhaltit (LAMSA), e ka përshkruar atmosferën me shprehjen se emigrantët “janë ulur mbi valixhe të paketuara”.
Por jo të gjithë ndajnë të njëjtin shqetësim.
Amidou Traore, këshilltar integrimi dhe politikan lokal me origjinë nga Bregu i Fildishtë, që jeton në Magdeburg, thotë se është i qetë dhe beson se njerëzit që kundërshtojnë politikën e AfD-së duhet të vazhdojnë të jenë aktivë në shoqëri.
Një komunitet emigrantësh në rritje
Saksoni-Anhalt ka një përqindje relativisht të ulët të shtetasve të huaj. Ata përbëjnë rreth 7,9 për qind të popullsisë së landit.
Deri në fund të vitit 2025, në land jetonin rreth 193 mijë persona me shtetësi të huaj, ndërsa gjatë dekadës së fundit numri i njerëzve me prejardhje ndërkombëtare është pothuajse dyfishuar.
Studentë ndërkombëtarë, punonjës të shëndetësisë, shkencëtarë dhe sipërmarrës janë bërë pjesë e rëndësishme e jetës ekonomike dhe shoqërore të landit.
Për shumë prej tyre, përfshirja në shoqata, biznese, komunitete fetare dhe struktura lokale është një mënyrë për të mbrojtur interesat e tyre dhe për të qenë pjesë aktive e shoqërisë.
“Edhe ne i përkasim këtij vendi”
Debati nuk kufizohet vetëm te emigracioni. Në qendër janë edhe çështje si arsimi, punësimi, mundësitë e barabarta dhe diskriminimi.
Studime mbi përvojat e njerëzve me ngjyrë në Gjermani tregojnë se shumë prej tyre raportojnë raste diskriminimi në institucione publike, në sistemin arsimor dhe në hapësirat publike.
