Një zhvillim i papritur ka ndodhur në Gjermani lidhur me bonusin e shumëpërfolur prej deri në 1.000 euro për punonjësit. Bundesrati ka refuzuar në momentet e fundit miratimin përfundimtar të këtij ligji, duke bllokuar kështu një vendim që ishte miratuar më parë nga Bundestagu dhe propozuar nga qeveria federale.
Projektligji parashikonte që punëdhënësit të kishin mundësinë t’u jepnin punonjësve të tyre një bonus deri në 1.000 euro, pa tatime dhe pa kontribute, si masë lehtësuese për përballimin e rritjes së çmimeve pas zhvillimeve ndërkombëtare, përfshirë konfliktin në Iran. Kjo skemë ishte planifikuar të qëndronte në fuqi deri në mesin e vitit 2027.
Megjithatë, iniciativa është përballur me kritika të shumta, veçanërisht nga bizneset, të cilat kanë theksuar se barra financiare bie mbi vetë kompanitë, në një kohë kur shumë prej tyre po përballen me sfida ekonomike.
Refuzimi në Bundesrat erdhi kryesisht për shkak të shqetësimeve nga përfaqësuesit e landeve, të cilët argumentuan se një pjesë e konsiderueshme e kostove – mbi dy të tretat – do të rëndonin mbi buxhetet e landeve dhe komunave. Si rezultat, projektligji nuk arriti të sigurojë shumicën e nevojshme.
Aktualisht, procesi mbetet i bllokuar dhe pagesat e planifikuara nuk do të realizohen. Ende nuk është e qartë nëse dhe kur mund të rikthehet kjo nismë, ndërsa pritet reagimi i qeverisë federale, e cila mund të kërkojë një procedurë ndërmjetësimi për të gjetur një zgjidhje kompromisi./kudoshqip.com
