Janë shtuar ndjeshëm debatet rreth gjendjes mendore të presidentit amerikan, Donald Trump, teksa media perëndimore po i kushtojnë gjithnjë e më shumë vëmendje kësaj çështjeje.
Sipas një artikulli të publikuar në revistën prestigjioze “British Medical Journal”, një grup prej 30 mjekësh amerikanë kanë ngritur shqetësime serioze mbi aftësinë e tij për të ushtruar detyra të rëndësishme shtetërore. Ata shkojnë deri aty sa e konsiderojnë situatën si një “rrezik të qartë dhe të menjëhershëm”, duke kërkuar ndërhyrje urgjente.
Në analizën e tyre, ekspertët – përfshirë neurologë, psikiatër dhe psikologë – theksojnë se Trump shfaq shenja të mundshme të rënies së aftësive njohëse. Ata përmendin fjalime të paqarta, kalime të papritura nga një temë në tjetrën dhe shenja lodhjeje gjatë paraqitjeve publike.
Një fotografi e publikuar së fundmi nga Reuters, ku Trump shihet me sytë e mbyllur gjatë një takimi në Zyrën Ovale, ka nxitur reagime të ndryshme. Ndërsa Shtëpia e Bardhë e minimizoi si një moment të zakonshëm, kritikët e panë si tregues të mungesës së përqendrimit.
Vëzhgime të tjera përfshijnë raste kur ai ngatërron emra, humbet rrjedhën e bisedës apo bie në kundërshtim me deklaratat e veta brenda një kohe të shkurtër. Po ashtu, janë komentuar edhe reagimet e tij impulsive në çështje ndërkombëtare, të cilat kanë habitur edhe aleatët.
Në të njëjtën kohë, kanë qarkulluar edhe raportime për shenja fizike si mavijosje në duar dhe një ecje e pasigurt, duke shtuar më tej spekulimet.
Mjekët gjithashtu ngrenë dyshime për prirje megalomane në deklaratat e tij, sidomos kur Trump flet për “teste të vështira inteligjence”. Në realitet, bëhet fjalë për testin MoCA, një procedurë e thjeshtë që përdoret për të identifikuar në faza të hershme probleme si demenca, dhe jo për matjen e inteligjencës.
Megjithatë, ekspertët kujtojnë edhe ekzistencën e “rregullit Goldwater” në psikiatri, i cili ndalon vendosjen e diagnozave pa një ekzaminim të drejtpërdrejtë. Për këtë arsye, ata shmangin përfundimet përfundimtare, por theksojnë nevojën për një vlerësim klinik të plotë.
Një kontroll i tillë pritet të zhvillohet në fund të muajit maj në spitalin ushtarak Walter Reed, ndërsa mbetet për t’u parë se sa transparente do të jenë rezultatet.
Debati mbi shëndetin mendor dhe fizik të Trump tashmë është kthyer në një çështje të rëndësishme politike dhe pritet të vazhdojë të jetë në qendër të vëmendjes./kudoshqip.com/
