Partia e ekstremit të djathtë Alternativa për Gjermaninë (AfD) ka konfirmuar drejtimin e saj në kongresin e mbajtur në Erfurt, ku delegatët rizgjodhën Alice Weidel si bashkëkryetare me 81,3% të votave, duke shënuar një rritje të mbështetjes krahasuar me dy vite më parë.
Në të njëjtën kohë, bashkëkryetari Tino Chrupalla, i cili drejton partinë prej shtatë vitesh, siguroi 70,05% të votave, një rezultat më i ulët në raport me kongresin e mëparshëm.
Gjatë fjalimeve të tyre, të dy drejtuesit theksuan ambiciet politike të partisë. Weidel e cilësoi AfD-në si “forcën e re popullore në Gjermani”, ndërsa Chrupalla u shpreh optimist për rezultate të forta në zgjedhjet rajonale të ardhshme, duke mos përjashtuar as mundësinë e qeverisjes së vetme në të ardhmen.
Një nga temat më të diskutuara të kongresit ishte lista e organizatave me të cilat anëtarët e AfD-së nuk lejohen të kenë lidhje. Björn Höcke, lider i degës së Turingisë dhe figurë kontroverse brenda partisë, kërkoi rishikimin e kësaj liste për të mundësuar hapje ndaj grupeve më radikale. Megjithatë, pas konsultimeve me drejtuesit, propozimi u tërhoq dhe nuk u përfshi në rendin e ditës.
Kongresi u zhvillua nën masa të rrepta sigurie dhe u shoqërua me protesta masive. Dhjetëra mijëra qytetarë dolën në rrugët e Erfurtit për të kundërshtuar politikat e AfD-së. Pavarësisht tensioneve dhe bllokimeve, mbledhja e delegatëve u zhvillua sipas planit.
AfD mbetet një nga forcat më të diskutuara në skenën politike gjermane. Disa nga strukturat e saj rajonale, veçanërisht në Turingi, Saksoni dhe Saksoni-Anhalt, janë klasifikuar nga autoritetet e sigurisë si me orientim të konfirmuar ekstremist të djathtë.
Në planin e politikës së jashtme, partia ka mbajtur qëndrime të debatueshme, përfshirë kundërshtimin ndaj pavarësisë së Kosovës dhe votimin kundër pranisë së ushtrisë gjermane në misionin KFOR.
Sipas sondazheve të fundit, AfD renditet ndër partitë me mbështetjen më të lartë në Gjermani, duke reflektuar ndikimin në rritje në opinionin publik dhe debatin politik në vend.
