13 vjet pas themelimit të saj, AfD synon të arrijë një sukses historik në Gjermani. Në Sachsen-Anhalt, kandidati i saj Ulrich Siegmund synon postin e Ministerpräsident-it dhe, nëse fiton, AfD do të drejtonte për herë të parë një land gjerman.
Programi i partisë fokusohet në disa prej çështjeve më të debatueshme të politikës gjermane:
Emigracioni: kontrolle më të forta kufitare, dëbim i personave që qëndrojnë ilegalisht dhe kufizim i emigracionit të parregullt.
Azilkërkuesit dhe puna: AfD kërkon që personat që përfitojnë të drejtën e qëndrimit të integrohen në tregun e punës dhe kundërshton varësinë afatgjatë nga sistemi social.
Arsimi: ndryshime të thella në sistemin arsimor dhe masa kundër asaj që partia e konsideron ndikim të tepruar fetar apo ideologjik në shkolla.
Energjia: kundërshtim të zgjerimit të energjisë së erës dhe një pjese të politikave klimatike, me synimin për energji më të lirë. AfD kërkon gjithashtu rikthimin e furnizimit me gaz rus.
Familja dhe LGBT: promovimi i familjes tradicionale, kufizime për përdorimin e simboleve LGBT në shkolla dhe kundërshtim të disa trajtimeve të afirmimit gjinor për të miturit.
Gjermania dhe BE: partia kërkon rikthimin e më shumë kompetencave te shteti gjerman, kontroll të plotë të kufijve dhe një reformim rrënjësor të Bashkimit Evropian. AfD ka mbajtur gjithashtu qëndrime që përfshijnë mundësinë e largimit nga eurozona.
Ukraina dhe Rusia: AfD kundërshton vazhdimin e mbështetjes ushtarake me miliarda euro për Ukrainën dhe kërkon ndryshim të politikës ndaj Rusisë, veçanërisht në sektorin energjetik.
Nënshtetësia: kërkohen kritere shumë më të rrepta për marrjen e pasaportës gjermane dhe një politikë më kufizuese të natyralizimit.
Pavarësisht izolimit politik nga partitë e tjera, AfD është shndërruar në një prej forcave kryesore të politikës gjermane dhe vazhdon të rritet në sondazhet kombëtare.
Një fitore në Sachsen-Anhalt do të ishte një moment historik për AfD-në dhe një sinjal i fortë se politika gjermane mund të jetë duke hyrë në një fazë të re.
