Promovimi i kulturës dhe traditës së Kosovës ishte në qendër të vëmendjes në aktivitetin “La Grande Fête”, të organizuar në La Maison Française pranë Ambasadës së Francës në Washington, D.C., ku vendi ynë u prezantua përkrah vendeve dhe rajoneve frankofone.
Në këtë ngjarje me karakter kulturor dhe ndërkombëtar, Kosova solli përpara qindra vizitorëve një pasqyrë autentike të trashëgimisë së saj, duke vënë theks të veçantë te gastronomia tradicionale. Pjesëmarrësit patën mundësinë të shijojnë specialitete të njohura si flija, mantia dhe sheqerparet, të shoqëruara me verëra vendore dhe birrën Besa Lager, duke përjetuar nga afër shijet karakteristike të kuzhinës kosovare.
Organizatorët vlerësuan se ky prezantim shërbeu si një urë lidhëse mes kulturave, duke forcuar bashkëpunimin dhe dialogun ndërkulturor në një mjedis miqësor dhe gjithëpërfshirës.
Një kontribut të rëndësishëm në realizimin e këtij prezantimi dha Toska Restaurant & Brewery, e cila u angazhua në mënyrë profesionale për të sjellë një përfaqësim sa më autentik të kuzhinës tradicionale.
Ngjarja u përmbyll me vlerësime pozitive nga të pranishmit, të cilët shprehën interes dhe entuziazëm për kulturën dhe traditat e Kosovës, duke e kthyer këtë mbrëmje në një përvojë të veçantë kulturore.
“Merci à toutes et à tous!” ishte mesazhi përmbyllës i organizatorëve, në shenjë mirënjohjeje për të gjithë ata që u bënë pjesë e këtij aktiviteti./kudoshqip.com/
