Në sheshin qendror të Munich, pranë ndërtesës historike të Bashkisë, aktivistë të Greenpeace zhvilluan një aksion simbolik në kuadër të zhvillimeve që shoqërojnë Konferencën e Sigurisë në Mynih.
Dy figura gjigante, që paraqesin presidentin amerikan Donald Trump dhe presidentin rus Vladimir Putin, u vendosën përpara një pankarte të madhe me mesazhin: “Break Free From Tyrants” (Çlirohuni nga tiranët). Në pankartë shfaqeshin gjithashtu portretet e dy liderëve, ndërsa aktivistët kërkonin më shumë përgjegjësi politike dhe angazhim të qartë për paqe dhe mbrojtje të klimës.
Mesazh politik dhe klimatik
Aksioni vjen në një kohë kur liderë botërorë, diplomatë dhe ekspertë të sigurisë janë mbledhur në Mynih për të diskutuar sfidat globale – nga lufta në Ukrainë te tensionet gjeopolitike dhe kriza klimatike. Sipas organizatorëve, mesazhi i protestës synon të theksojë rrezikun që, sipas tyre, paraqet rikthimi i politikave autoritare dhe dobësimi i bashkëpunimit ndërkombëtar në çështjet e sigurisë dhe klimës.
Figura e fryrë e dy liderëve, e vendosur në një ambient publik me prani të madhe qytetarësh dhe mediash ndërkombëtare, tërhoqi vëmendjen e kalimtarëve dhe turistëve. Disa ndaluan për të fotografuar, ndërsa të tjerë diskutonin mbi simbolikën e mesazhit.
Konferenca nën hijen e tensioneve globale
Munich Security Conference konsiderohet një nga forumet më të rëndësishme ndërkombëtare për sigurinë dhe politikën e jashtme. Çdo vit, konferenca shndërrohet edhe në një platformë për protesta dhe reagime të shoqërisë civile, të cilat synojnë të ndikojnë në debatin global.
Këtë vit, temat kryesore përfshijnë luftën në Ukrainë, arkitekturën e re të sigurisë në Evropë, marrëdhëniet SHBA–BE, si dhe tranzicionin energjetik. //kudoshqip.com//
