Shkencëtarja kosovare Pranvera Hyseni ka arritur një sukses të jashtëzakonshëm në një nga ngjarjet më prestigjioze globale në fushën e shkencave planetare. Në konferencën ndërkombëtare që u mbajt në Houston, Teksas, ku marrin pjesë mbi 2 mijë studiues nga mbarë bota, ajo u dallua me paraqitjen e saj shkencore.
Kjo ishte hera e tretë që Hyseni merr pjesë në këtë konferencë të rëndësishme, ku prezantoi punimin e saj para një audience ndërkombëtare ekspertësh. Ajo theksoi se, përveç aspektit profesional, një nga momentet më domethënëse për të ishte përfaqësimi i Kosovës në një skenë të tillë globale.
Në përfundim të konferencës, ajo u shpërblye me çmimin “Best Oral Presentation”, duke u renditur ndër prezantuesit më të suksesshëm në mesin e mijëra pjesëmarrësve.
Përmes një mesazhi motivues, Hyseni u bëri thirrje të rinjve në Kosovë që të mos heqin dorë nga synimet e tyre, duke theksuar se rruga drejt suksesit është e mundur pavarësisht sfidave. Ajo ndau edhe përvojën e saj personale, duke treguar se brenda pak vitesh ka kaluar nga një jetë e thjeshtë në Kosovë në konkurrim me shkencëtarë të nivelit ndërkombëtar.
