Më 26 shkurt 2026, me rastin e 18-vjetorit të Pavarësisë së Republikës së Kosovës, Konsullata e Përgjithshme e Republikës së Kosovës në Mynih hapi dyert për një mbrëmje festive, të mbushur me emocion, krenari dhe dashuri për atdheun.
Në këtë organizim morën pjesë bashkatdhetarë të shumtë nga breza dhe fusha të ndryshme, të cilët u mblodhën për të shënuar së bashku një datë që bashkon zemrat e shqiptarëve kudo që ndodhen. Nën tingujt e Himnit të Republikës së Kosovës dhe Himnit Kombëtar, u ndie fuqishëm fryma e unitetit dhe mirënjohjes për rrugëtimin e shtetit tonë.
Në fjalën e tij përshëndetëse, Konsulli i Përgjithshëm, z. Afrim Nura, rikujtoi domethënien historike të 17 Shkurtit si simbol i lirisë, sakrificës dhe shpresës për të ardhmen. Ai theksoi rëndësinë e ruajtjes së lidhjes me atdheun dhe kontributin e diasporës në forcimin e imazhit dhe zhvillimit të Kosovës në arenën ndërkombëtare.
Programi artistik u pasurua nga interpretimi i kitaristes Tringa Sadiku, e cila i dha mbrëmjes një dimension të veçantë artistik, duke shtuar ndjeshmëri dhe elegancë në atmosferën festive.
Shijet tradicionale shqiptare dhe verërat “Made in Kosova” sollën aromën e vendlindjes në zemër të Bavarisë, duke e shndërruar këtë pritje në një moment të ngrohtë takimi dhe bashkimi.
Kosova është më shumë se një atdhe – është ndjenjë, kujtesë dhe krenari që jeton brenda nesh.
