Republika e Kosovës dhe Republika e Panamasë kanë shënuar një hap të rëndësishëm në thellimin e marrëdhënieve dypalëshe, duke nënshkruar marrëveshjen për heqjen e vizave për mbajtësit e pasaportave diplomatike dhe zyrtare.
Marrëveshja u nënshkrua nga zëvendësministri i Punëve të Jashtme dhe Diasporës i Republikës së Kosovës, Kreshnik Ahmeti, dhe ministri i Punëve të Jashtme i Republikës së Panamasë, Carlos A. Hoyos, në një ceremoni zyrtare që rikonfirmoi përkushtimin e të dyja vendeve për avancimin e bashkëpunimit dhe forcimin e lidhjeve diplomatike.
Gjatë takimit dypalësh që i parapriu nënshkrimit, palët diskutuan për nisjen e procedurave drejt heqjes së vizave edhe për mbajtësit e pasaportave të rregullta. Po ashtu, u trajtua zgjerimi i bashkëpunimit në fusha me interes të përbashkët, përfshirë sigurinë, arsimin e lartë dhe turizmin.
Ndër të tjera, u ra dakord që raundi i ardhshëm i konsultimeve politike ndërmjet dy ministrive, në nivel të zëvendësministrave, të mbahet në Prishtinë në fund të vitit 2026.
