Shumë organizata dhe qendra në Gjermani që ofrojnë mbështetje për azilkërkuesit pritet të përballen me sfida financiare, pasi qeveria po shqyrton mundësinë e ndërprerjes së financimit për shërbimet e pavarura të këshillimit.
Sipas raportimeve mediatike, Ministria e Brendshme po planifikon të mos mbështesë më këto shërbime duke filluar nga viti i ardhshëm. Organizatat që operojnë në këtë fushë, përfshirë edhe disa nga më të mëdhatë në sektorin humanitar, janë njoftuar për këtë mundësi. Megjithatë, ministria ka theksuar se vendimet përfundimtare do të merren në kuadër të negociatave për buxhetin e vitit 2027, të cilat ende nuk kanë përfunduar.
Raportimet janë konfirmuar edhe nga përfaqësues politikë. Deputeti i Partisë së Gjelbër, Leon Eckert, deklaroi se arsyeja kryesore lidhet me kufizimet buxhetore, ndërsa kritikoi këtë qasje si problematike për politikën e migracionit dhe aspektin humanitar.
Aktualisht, rreth 25 milionë euro janë paraparë për financimin e këtyre shërbimeve gjatë këtij viti. Ndërkohë, në marrëveshjen e koalicionit ndërmjet CDU/CSU dhe SPD theksohet se roli i këshillimit të pavarur për azilin duhet të vlerësohet në mënyrë të paanshme.
Nëse ky plan zbatohet, ai mund të ketë ndikim të drejtpërdrejtë në mbështetjen që marrin azilkërkuesit gjatë procedurave të tyre në Gjermani. /kudoshqip.com
