Parlamenti gjerman ka miratuar një paketë të re masash për të frenuar rritjen e shpejtë të çmimeve të karburanteve, një fenomen që është theksuar pas tensioneve të fundit në Lindjen e Mesme dhe përshkallëzimit të konfliktit në Iran.
Sipas vendimit të ri të Bundestagu, pikat e karburantit do të lejohen të rrisin çmimet vetëm një herë në ditë, konkretisht në mesditë. Qëllimi i kësaj mase është të ndalet praktika e ndryshimeve të shpeshta të çmimeve brenda të njëjtës ditë. Ndërkohë, uljet e çmimeve do të mbeten të pakufizuara dhe mund të bëhen në çdo moment.
Autoritetet kanë paralajmëruar se shkeljet e këtij rregulli do të ndëshkohen me gjoba të larta, që mund të arrijnë deri në 100 mijë euro.
Ligji i ri përfshin gjithashtu masa shtesë për rritjen e transparencës në tregun e karburanteve, si pjesë e rregullave antitrust. Ai u mbështet nga partitë në pushtet CDU/CSU dhe SPD, si dhe nga të Gjelbrit, ndërsa opozita, përfshirë të Majtën dhe AfD, votoi kundër.
Rritja e çmimeve të karburanteve në Gjermani është përshpejtuar që nga fundi i shkurtit, pas sulmeve të SHBA-së dhe Izraelit ndaj Iranit dhe kundërpërgjigjeve iraniane në rajonin e Gjirit, duke çuar çmimet në mbi 2 euro për litër.
Ekspertët paralajmërojnë se kjo situatë mund të ndikojë në rritjen e inflacionit gjatë muajit mars. Qeveria gjermane ka miratuar tashmë paketën ligjore në mes të marsit, ndërsa hyrja në fuqi pritet të ndodhë në fillim të prillit. Masat do të rishikohen pas një periudhe njëvjeçare.
Ndërkohë, në kuadër të diskutimeve brenda koalicionit qeverisës CDU/CSU-SPD, po shqyrtohen edhe hapa të tjerë për të lehtësuar barrën financiare, si ulja e tarifave për transportin e mallrave apo rritja e subvencioneve për udhëtarët.
Në tryezë mbeten edhe propozime të tjera, përfshirë një ulje të mundshme të TVSH-së për karburantet, vendosjen e një takse mbi fitimet e kompanive energjetike, si dhe një kufizim të drejtpërdrejtë të çmimeve në treg. Këto masa janë ende në fazë diskutimi dhe nuk janë miratuar përfundimisht./kudoshqip.com/
