Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet ndaj Belinda Ballukut, lidhur me dyshimet për shkelje në procedurat e tenderimit për Tunelin e Llogarasë dhe Unazën e Madhe.
Ballukut i është komunikuar përfundimi i hetimeve, ndërsa ndaj saj rëndojnë disa akuza, përfshirë shkeljen e barazisë së pjesëmarrësve në tendera, korrupsionin pasiv dhe pastrimin e produkteve të veprës penale.
Më 20 tetor, SPAK i komunikoi Ballukut akuzat për “Shkelje të barazisë së pjesëmarrësve në tendera apo ankande publike”, në bashkëpunim, në nëntë raste, si dhe për “Korrupsion pasiv të personave që ushtrojnë funksione publike” dhe “Korrupsion pasiv të funksionarëve të lartë shtetërorë ose të të zgjedhurve vendorë”.
Ajo akuzohet gjithashtu për refuzim të deklarimit, mosdeklarim, fshehje ose deklarim të rremë të pasurive dhe interesave privatë, në dy raste, si dhe për pastrim të produkteve të veprës penale ose të veprimtarisë kriminale, në bashkëpunim dhe më shumë se një herë, lidhur me dy pasuri të paluajtshme.
Sipas njoftimit të SPAK-ut të publikuar më 9 shtator 2026, Balluku ishte marrë e pandehur nën dyshimet për shkelje të barazisë së pjesëmarrësve në tendera, në bashkëpunim, në tetë procedura prokurimi.
Vlera e përgjithshme e procedurave të përfshira në hetim kalon 600 milionë euro. Prokuroria dyshon se gjatë këtyre procedurave janë krijuar avantazhe të padrejta për operatorë ekonomikë të caktuar.
Në kuadër të hetimeve, në qershor të vitit 2026, Gjykata e Posaçme vendosi sekuestrimin preventiv të një vile në Dhërmi. Sipas dyshimeve të prokurorisë, kjo pasuri mund të lidhet me përfitime të parregullta.
Ndërkaq, në shtator, SPAK njoftoi edhe sekuestrimin e një prone në Palasë, për të cilën dyshohet se lidhet me përfitime të parregullta nga procedura e tenderimit për Lotin 7 të Unazës së Madhe.
Përfundimi i hetimeve hap rrugën për hapat e mëtejshëm proceduralë në këtë çështje. Akuzat ndaj Ballukut mbeten pretendime të organit të akuzës, ndërsa përgjegjësia penale përcaktohet nga gjykata.