Mijëra mërgimtarë që po kthehen nga Kosova drejt vendeve të Evropës janë përballur me pritje të gjata në kufirin ndërmjet Serbisë dhe Kroacisë.
Sipas raportimeve nga terreni, pritjet në këtë pikë kufitare kanë kaluar 10 orë, ndërsa shumë udhëtarë kanë kaluar edhe natën në kolona të gjata automjetesh.
Situata është veçanërisht e vështirë për familjet me fëmijë dhe për udhëtarët që tashmë kanë përshkuar qindra kilometra nga Kosova. Kolonat e gjata dhe lëvizja e ngadalësuar kanë krijuar vështirësi të mëdha për mijëra persona që po përpiqen të rikthehen në Gjermani, Austri, Zvicër dhe vende të tjera të Evropës.
Udhëtarët që ndodhen në vendngjarje raportojnë se pritjet janë të mundimshme, ndërsa për shkak të kohës së gjatë të qëndrimit në kolona, disa prej tyre kanë mbetur edhe pa ushqime dhe ujë. Në disa segmente të rrugës, mundësitë për furnizim janë të kufizuara.
Kjo situatë vjen në një nga periudhat më të ngarkuara të sezonit veror, kur mijëra mërgimtarë po përfundojnë pushimet në Kosovë dhe po nisin kthimin drejt vendeve ku jetojnë dhe punojnë.
Për ata që planifikojnë të udhëtojnë gjatë ditëve në vijim, gjendja në kufijtë e Serbisë, Kroacisë dhe Hungarisë duhet të merret seriozisht parasysh, veçanërisht për shkak të fluksit të madh të automjeteve./kudoshqip.com
