Gjermania po përjeton një periudhë të fortë në sektorin e turizmit, me një numër rekord të netëve të qëndrimit gjatë gjysmës së parë të vitit. Por, sa e preferojnë vetë gjermanët vendin e tyre për pushime?
Të dhënat më të fundit të Zyrës Federale të Statistikave tregojnë se hotelet, strukturat akomoduese dhe kampingjet në Gjermani kanë regjistruar rreth 223,8 milionë netë qëndrimi gjatë gjashtë muajve të parë të vitit. Bëhet fjalë për një nivel rekord për këtë periudhë.
Krahasuar me të njëjtën periudhë të vitit të kaluar, numri i netëve të qëndrimit është rritur me 0,3 për qind. Shifrat tregojnë gjithashtu se pjesa dërrmuese e turistëve janë vetë banorë të Gjermanisë.
Rreth 187,4 milionë netë janë regjistruar nga turistët vendas, ndërsa vizitorët nga jashtë kanë realizuar rreth 36,4 milionë netë qëndrimi. Turizmi ndërkombëtar ka shënuar kështu një rritje prej rreth 0,5 për qind krahasuar me një vit më parë.
Shifrat japin një sinjal pozitiv edhe për ekonominë. Hotelet, restorantet, kampingjet, qendrat turistike dhe bizneset lokale përfitojnë drejtpërdrejt nga numri i lartë i vizitorëve. Paralelisht, interesi për investime në destinacione turistike dhe oferta të reja për pushuesit po vazhdon të rritet.
Megjithatë, statistikat zyrtare nuk e përfshijnë të gjithë turizmin. Në llogaritje hyjnë kryesisht strukturat akomoduese me të paktën 10 shtretër, si dhe kapacitetet e regjistruara të kampingjeve. Apartamentet private, akomodimet më të vogla dhe disa forma të tjera të qëndrimit nuk përfshihen në këto të dhëna.
Për këtë arsye, numri real i personave që zgjedhin Gjermaninë për pushime mund të jetë dukshëm më i lartë se sa tregojnë statistikat zyrtare.
Në një kohë kur shumë njerëz zgjedhin destinacione jashtë vendit, shifrat tregojnë se Gjermania vazhdon të ketë një treg të fuqishëm të turizmit vendas./kudoshqip.com
