KFOR ka nisur procesin e transferimit gradual të përgjegjësive të sigurisë në urën kryesore mbi lumin Ibër në Mitrovicë, duke ia kaluar këtë rol Policisë së Kosovës, në koordinim me EULEX-in dhe institucionet përkatëse vendore e ndërkombëtare.
Sipas misionit të NATO-s në Kosovë, vendimi është marrë në kuadër të një tranzicioni të planifikuar dhe lidhet me vlerësimin se situata e sigurisë në vend është përmirësuar. KFOR pritet të vazhdojë të monitorojë zhvillimet, ndërsa përgjegjësia direkte për sigurinë në urë do të kalojë gradualisht te institucionet kosovare.
Ky zhvillim vjen në një kohë kur në Kosovë po diskutohet edhe mundësia e hapjes së urës për qarkullimin e automjeteve, një çështje që prej vitesh ka qenë veçanërisht e ndjeshme për shkak të situatës politike dhe të sigurisë në veri të vendit.
Vendimin e KFOR-it e ka kundërshtuar Lista Serbe, e cila ka kërkuar që të mos reduktohet prania e trupave ndërkombëtare në këtë pikë strategjike. Sipas saj, prania e KFOR-it në urë mbetet e rëndësishme për ruajtjen e stabilitetit dhe parandalimin e tensioneve.
Ura mbi Ibër ka qenë për vite me radhë një nga pikat më të ndjeshme në Mitrovicë. E ndodhur në vijën ndarëse mes pjesës veriore dhe jugore të qytetit, ajo është shndërruar në një simbol të ndarjes së komuniteteve pas luftës.
Tani, me kalimin gradual të përgjegjësive te Policia e Kosovës, ura mund të hyjë në një fazë të re. Nëse procesi shoqërohet edhe me hapjen e saj për automjetet, ajo mund të marrë një rol tjetër – nga një simbol i ndarjes, në një pikë që lidh dy pjesët e Mitrovicës./kudoshqip.com
