Autoritetet gjermane janë vënë në gjendje të lartë gatishmërie pas zbulimit të një droni të pajisur me lëndë shpërthyese brenda perimetrit të aeroportit Leipzig/Halle, një nga nyjet më të rëndësishme logjistike në vend.
Ministri i Brendshëm, Alexander Dobrindt, e cilësoi incidentin si një zhvillim shqetësues që shënon “një nivel krejtësisht të ri kërcënimi”, duke mos përjashtuar mundësinë që bëhet fjalë për një operacion të sofistikuar me elementë të një sulmi hibrid. Sipas tij, rrethanat e ngjarjes sugjerojnë përfshirjen e aktorëve me kapacitete profesionale, ndërsa hetimet janë në vijim për të përcaktuar origjinën dhe qëllimin e dronit.
Burime të sigurisë bëjnë të ditur se pajisja ishte e ngarkuar me eksploziv me karakteristika të avancuara, ndërsa ndërhyrja e shpejtë e specialistëve të Policisë Federale bëri të mundur neutralizimin e ndezësit, duke shmangur një shpërthim të mundshëm. Fluturimet në aeroport u pezulluan përkohësisht gjatë operacionit të sigurisë.
Sipas raportimeve nga mediat gjermane, përfshirë NDR, WDR dhe Süddeutsche Zeitung, një defekt i mundshëm në mekanizmin ndezës mund të ketë parandaluar një incident me pasoja të rënda. Droni raportohet se është gjetur në afërsi të një avioni transportues ukrainas, duke shtuar edhe më tej dyshimet për motivet e ngjarjes.
Vetëm pak orë pas këtij zbulimi, një avion mallrash raportoi një përplasje me një objekt të paidentifikuar gjatë fluturimit dhe u detyrua të kryejë ulje emergjente në Hanover, me dëmtime të lehta. Autoritetet po hetojnë nëse ekziston ndonjë lidhje mes dy incidenteve.
Aeroporti Leipzig/Halle ka një rol kyç në transportin e materialeve, përfshirë edhe ato të lidhura me mbështetjen ndërkombëtare për Ukrainën. Që prej nisjes së luftës në Ukrainë, në Gjermani është vërejtur një rritje e aktiviteteve të dyshimta pranë infrastrukturës kritike, përfshirë përdorimin e dronëve për qëllime vëzhgimi.
Ngjarja ka ngritur shqetësime serioze në nivel politik dhe të sigurisë kombëtare, ndërsa institucionet përkatëse janë angazhuar për të sqaruar plotësisht rrethanat dhe për të vlerësuar nëse bëhet fjalë për një kërcënim të ri të organizuar ndaj sigurisë së vendit./kudoshqip.com
