Valët e të nxehtit që kanë përfshirë Gjermaninë gjatë muajve të fundit kanë shkaktuar pasoja të rënda për shëndetin publik. Sipas vlerësimeve të Institutit Robert Koch (RKI), deri në mesin e muajit korrik rreth 9.800 persona kanë humbur jetën si pasojë e temperaturave të larta, ndërsa ekspertët paralajmërojnë se ky numër pritet të rritet.
Të dhënat përfshijnë periudhën nga fillimi i prillit deri më 19 korrik 2026 dhe tashmë tejkalojnë rekordin e mëparshëm të regjistruar në vitin 2018, kur gjatë gjithë vitit u raportuan rreth 9.000 viktima të lidhura me vapën.
Megjithatë, bilanci përfundimtar mund të jetë edhe më i lartë, pasi në analizën aktuale nuk janë përfshirë ende ditët me temperatura ekstreme që pasuan pas 19 korrikut. Instituti pritet të përditësojë shifrat sapo të jenë të disponueshme të dhënat e plota mbi vdekshmërinë.
Vala e nxehtit në qershor pati ndikimin më të madh
Sipas ekspertëve, më shumë se 5.000 vdekje lidhen me valën intensive të të nxehtit që goditi Gjermaninë gjatë gjysmës së dytë të qershorit, kur në disa rajone temperaturat iu afruan 42 gradë Celsius.
Edhe Shërbimi Evropian për Ndryshimet Klimatike Copernicus raportoi se qershori i vitit 2026 ishte më i nxehti i regjistruar ndonjëherë në Evropën Perëndimore.
Ndërkohë, Zyra Federale e Statistikave bëri të ditur se gjatë javës 22–28 qershor numri i vdekjeve në Gjermani ishte rreth 32 për qind më i lartë krahasuar me të njëjtën periudhë të vitit të kaluar.
Të moshuarit mbeten grupi më i rrezikuar
Analizat e Institutit Robert Koch tregojnë se pjesa më e madhe e viktimave ishin persona të moshës 75 vjeç e lart, të cilët përbëjnë shumicën dërrmuese të rasteve të lidhura me temperaturat ekstreme.
Ekspertët theksojnë se vapa rrallëherë shënohet si shkaku i drejtpërdrejtë i vdekjes, përveç rasteve të goditjes nga nxehtësia. Në shumicën e rasteve, temperaturat e larta përkeqësojnë sëmundjet ekzistuese, si ato të zemrës, sistemit të frymëmarrjes apo veshkave, duke çuar në komplikime fatale.
Për këtë arsye, nxehtësia konsiderohet shpesh një “shkak i heshtur i vdekjes”, pasi nuk figuron drejtpërdrejt në certifikatat e vdekjes, edhe pse luan një rol vendimtar në përkeqësimin e gjendjes shëndetësore të pacientëve.
Autoritetet shëndetësore vazhdojnë t’u bëjnë thirrje qytetarëve, veçanërisht të moshuarve dhe personave me sëmundje kronike, të shmangin ekspozimin në diell gjatë orëve më të nxehta, të konsumojnë mjaftueshëm lëngje dhe të ndjekin rekomandimet e institucioneve për mbrojtjen nga temperaturat ekstreme.
