Boksieri shqiptar Kristian Prenga e nisi në mënyrë spektakolare duelin ndaj ish-kampionit të botës Anthony Joshua, por nuk arriti ta ruante avantazhin, duke u mposhtur me nokaut në raundin e dytë në përballjen e zhvilluar në Xhedah të Arabisë Saudite.
Fillimi i ndeshjes ishte befasues. Vetëm pak çaste pas gongut të parë, Prenga goditi Joshuan me një uppercut të fuqishëm, duke e rrëzuar britanikun në tapet. Joshua u ngrit për të vazhduar ndeshjen, por gjatë pjesës së mbetur të raundit të parë u pa disa herë në vështirësi, ndërsa Prenga kontrolloi ritmin dhe la përshtypje shumë të mira.
Momenti kur Joshua u gjunjëzua surprizoi publikun dhe komentatorët, duke e bërë raundin e parë një nga fillimet më të vështira të karrierës së boksierit britanik.
Megjithatë, situata ndryshoi plotësisht në raundin e dytë. Joshua u rikthye më agresiv, duke përdorur më mirë distancën dhe duke gjetur vazhdimisht objektivin me kombinimet e tij. Ndërkohë, Prenga humbi iniciativën që kishte fituar në fillim të ndeshjes dhe u detyrua të mbrohej gjithnjë e më shumë.
Rreth 40 sekonda para përfundimit të raundit të dytë, Joshua realizoi një seri goditjesh të fuqishme që e rrëzuan boksierin shqiptar në tapet. Prenga nuk arriti të ngrihej brenda numërimit të gjyqtarit dhe dueli u mbyll me fitore me nokaut për Anthony Joshuan.
Pavarësisht humbjes, Kristian Prenga zhvilloi një paraqitje që tregoi potencialin e tij, veçanërisht me fillimin e fortë të ndeshjes, duke e vendosur për disa momente një nga emrat më të mëdhenj të boksit botëror në vështirësi.
