Institucionet e Kosovës kanë nisur një proces të gjerë verifikimi të përfituesve të shtesave për fëmijë, mes dyshimeve në rritje për keqpërdorime të mundshme, veçanërisht nga familjet që nuk jetojnë më në vend.
Tema e përfitimeve sociale ka qenë prej kohësh në qendër të debatit publik, ku shpesh është ngritur shqetësimi se një pjesë e këtyre fondeve mund të jenë përdorur edhe për qëllime elektorale. Dyshimet janë shtuar sidomos në rastet kur përfitues rezultojnë familje që tashmë jetojnë jashtë Kosovës.
Sipas të dhënave zyrtare, aktualisht rreth 406 mijë fëmijë përfitojnë çdo muaj nga skema e shtesave të rritura. Megjithatë, jo të gjithë këta fëmijë besohet se jetojnë në territorin e Kosovës. Vetëm gjatë vitit të kaluar, mbi 37 mijë qytetarë janë larguar nga vendi, çka ka ngritur pikëpyetje serioze nëse një pjesë e përfitimeve po vazhdojnë të shpërndahen jashtë kritereve ligjore.
Përballë këtyre zhvillimeve, Ministria e Financave ka ndërmarrë një aksion të detajuar për të verifikuar listat ekzistuese dhe për të identifikuar rastet e mundshme të abuzimit. Fokusi kryesor mbetet te familjet që kanë emigruar për bashkim familjar, por që vazhdojnë të përfitojnë nga buxheti i Kosovës.
Ekspertët kanë kritikuar sistemin aktual, duke theksuar mungesën e një ndërlidhjeje efikase mes institucioneve dhe databazave shtetërore, si dhe kriteret jo gjithmonë të qarta për përfitim. Këto dobësi, sipas tyre, krijojnë hapësirë për keqpërdorime dhe shpërndarje jo të drejtë të fondeve publike.
Procesi i verifikimit pritet të sjellë pastrim të listave dhe një kontroll më të rreptë mbi mënyrën e shpërndarjes së shtesave, me qëllim garantimin që ndihma të arrijë vetëm te familjet që plotësojnë kushtet ligjore dhe jetojnë në Kosovë./kudoshqip.com
