Fondi i Kursimeve Pensionale të Kosovës ka shënuar një rekord të ri në performancën e investimeve, duke realizuar 312 milionë euro kthime bruto vetëm gjatë gjysmës së parë të vitit 2026.
Sipas të dhënave të publikuara, kjo përbën nivelin më të lartë ndonjëherë të arritur në një periudhë gjashtëmujore nga Trusti. Ndërkaq, në periudhën 2023 – qershor 2026, kthimet totale bruto nga investimet kanë arritur në rreth 956 milionë euro.
Këto rezultate konsiderohen me rëndësi të veçantë për stabilitetin financiar të sistemit pensional në vend, pasi ndikojnë drejtpërdrejt në rritjen e kursimeve të qindra mijëra kontribuuesve dhe në forcimin e sigurisë së tyre ekonomike për të ardhmen.
Në një reagim lidhur me këtë zhvillim, Kryesuesi i Bordit të Trustit ka vlerësuar lart angazhimin e të gjitha strukturave të përfshira në këtë sukses, duke përfshirë Bordin, Komitetin e Investimeve, menaxhmentin dhe ekipin profesional, si dhe partnerët vendorë dhe ndërkombëtarë.
Ai theksoi se rezultate të tilla janë produkt i profesionalizmit, disiplinës, bashkëpunimit dhe një qasjeje strategjike afatgjatë në menaxhimin e investimeve.
Megjithatë, sipas tij, potenciali i Trustit mbetet edhe më i madh. Ai ka nënvizuar nevojën për një kornizë të re ligjore ose amandamentime që do t’i mundësonin institucionit më shumë fleksibilitet dhe qasje në instrumente moderne të investimit, në përputhje me zhvillimet dinamike të tregjeve financiare globale.
“Institucionet që veprojnë me shpejtësi, me standarde të larta të qeverisjes dhe menaxhimit të rrezikut, janë ato që arrijnë rezultatet më të mira në afat të gjatë,” është theksuar në këtë kontekst.
Objektivi kryesor mbetet jo vetëm ruajtja, por edhe rritja e qëndrueshme dhe profesionale e kursimeve pensionale, në mënyrë që kontribuuesit të përfitojnë maksimalisht nga zhvillimet e ekonomisë globale.
Ky zhvillim sinjalizon një perspektivë pozitive për të ardhmen e Trustit dhe për mirëqenien financiare të qytetarëve të Kosovës./kudoshqip.com/
