Raportimet e fundit sugjerojnë një zhvillim të rëndësishëm në konfliktin mes Shteteve të Bashkuara të Amerikës dhe Iranit, ku palët thuhet se kanë arritur një marrëveshje paraprake për përfundimin e luftës.
Sipas burimeve fillestare, informacioni është bërë publik nga Pakistani, i cili ka luajtur rol ndërmjetësues në bisedimet mes dy vendeve. Në vijim, edhe Presidenti amerikan, Donald Trump, ka konfirmuar përmes platformës së tij “Truth Social” se është arritur një marrëveshje kornizë paqësore me Iranin.
Në deklaratën e tij, Trump theksoi se, në kuadër të kësaj marrëveshjeje, ka autorizuar hapjen e Ngushticës së Hormuzit, një nga korridoret më strategjike për tregtinë globale të energjisë. Njëkohësisht, ai njoftoi edhe për heqjen e menjëhershme të bllokadës detare amerikane ndaj porteve iraniane.
Megjithatë, deri në këto momente, pala iraniane nuk ka dhënë një konfirmim zyrtar për marrëveshjen, duke lënë hapësirë për paqartësi dhe zhvillime të mundshme të reja në ditët në vijim.
Sipas burimeve diplomatike, marrëveshja pritet të nënshkruhet të premten. Nëse kjo realizohet, ajo do të shënonte fundin e një konflikti që ka shkaktuar humbje të mëdha njerëzore dhe pasoja të rënda ekonomike në nivel global.
Rëndësia e kësaj marrëveshjeje lidhet ngushtë edhe me stabilitetin e tregjeve ndërkombëtare të energjisë, pasi rreth 20 për qind e furnizimit botëror me naftë kalon përmes Ngushticës së Hormuzit.
Zhvillimet e ardhshme dhe reagimi zyrtar i Iranit pritet të jenë vendimtare për të përcaktuar nëse kjo marrëveshje do të konkretizohet dhe do të sjellë një paqe të qëndrueshme në rajon./kudoshqip.com/
